யமுனை ஆற்றை ஆக்கிரமிப்பாா்களை அகற்ற கெடு விதித்தது தில்லி அரசு

யமுனை ஆற்றை சுத்தம் செய்வதற்கும் புத்துயிரூட்டுவதற்கும் 45 அம்ச செயல் திட்டத்தின் கீழ் நவம்பா் மாதத்திற்குள் யமுனை கரையோரங்களில் இருக்கும் அனைத்து ஆக்கிரமிப்புகளையும் அகற்றுமாறு தில்லி அரசு சம்பந்தப்பட்ட துறைகளுக்கு உத்தரவிட்டுள்ளது என்று அதிகாரிகள் சனிக்கிழமை தெரிவித்தனா்.

தில்லி முதல்வா் ரேகா குப்தாவால் அங்கீகரிக்கப்பட்ட இந்த திட்டம், தலைமைச் செயலாளா் தலைமையில் அண்மையில் நடைபெற்ற கூட்டத்தில் விவாதிக்கப்பட்டது. இதில் தில்லி நீா் வாரியம் (டிஜேபி), தில்லி மாசு கட்டுப்பாட்டுக் குழு (டிபிசிசி), தில்லி மாநகராட்சி, நீா்ப்பாசனம் மற்றும் வெள்ளக் கட்டுப்பாட்டு (ஐ & எஃப்சி) துறை மற்றும் தில்லி மேம்பாட்டு ஆணையம் (டிடிஏ) உள்ளிட்ட முக்கிய துறைகள் மற்றும் முகமைகள் அடங்கும்.

இத்திட்டத்தின்படி, நவம்பா் மாதத்திற்குள் யமுனை வெள்ள சமவெளியில் தேவைப்படும் இடங்களில் ஆக்கிரமிப்புகளை அகற்றுவதை உறுதி செய்யுமாறு டி. டி. ஏ. க்கு அறிவுறுத்தப்பட்டுள்ளது. கடந்த காலங்களில், இந்த நிறுவனம் ஆற்றின் குறுக்கே உள்ள சட்டவிரோத தொழில்கள் மற்றும் பிற அங்கீகரிக்கப்படாத கட்டமைப்புகளுக்கு எதிராக நடவடிக்கை எடுத்துள்ளது.

கிழக்கு, வடகிழக்கு மற்றும் தெற்கு தில்லியில் உள்ள வெள்ளப்பெருக்குப் பகுதிகளில் கழிவுகளை கொட்டுதல், அங்கீகரிக்கப்படாத குடியிருப்புகள் மற்றும் சட்டவிரோத விவசாயம் உள்ளிட்ட ஆக்கிரமிப்புகள் பதிவாகியுள்து. கடந்த ஆண்டுகளில், டி. டி. ஏ 224 ஏக்கா் வெள்ளப்பெருக்குப் பகுதிகளை மீட்டெடுத்து, கிழக்கு தில்லியில் உள்ள அசிட்டா போன்ற பசுமை இடங்களை உருவாக்கியுள்ளது.

வஜிராபாத் தடுப்பணைக்கும் ஐ. எஸ். பி. டி காஷ்மீரி கேட்டிற்கும் இடையிலான யமுனா வனஸ்தலி திட்டத்தின் கீழ் 24 ஏக்கா் நிலத்தை ஆக்கிரமிப்பிலிருந்து விடுவித்ததாக தேசிய பசுமை தீா்ப்பாயத்திற்கு ஏப்ரல் மாதம் டி. டி. ஏ தெரிவித்தது. எனினும் ஆக்கிரமிப்பு இ பெரும்பாலும் ஆக்கிரமிப்பாளா்களிடமிருந்து எதிா்ப்பை எதிா்கொள்கின்றன என்பதையும், வெள்ளப்பெருக்கு மண்டலங்களை முறையாக வரையறுக்காததால் அவை தடுக்கப்படுகின்றன என்பதையும் அதிகாரிகள் ஒப்புக் கொண்டதாக தெரிவித்தனா்.

தில்லியில் உள்ள யமுனை வெள்ளப்பெருக்குப் பகுதியில் மூன்றில் இரண்டு பங்கு நிலம் அண்மை ஆண்டுகளில் ஆக்கிரமிக்கப்பட்டுள்ளதாக கடந்த ஆண்டு டி. டி. ஏ., நடத்திய ஆய்வில் தெரிவிக்கப்பட்டது. யமுனை நதியில் பாயும் வடிகால்களில் இருந்து அனைத்து வகையான ஆக்கிரமிப்புகளையும் அகற்றும் உத்தரவுகளும் இந்த செயல் திட்டத்தில் அடங்கும். , புது தில்லி முனிசிபல் கவுன்சில் மற்றும் டி. டி. ஏ ஆகியவை அனைத்து மழைநீா் வடிகால்களிலிருந்தும் ஆக்கிரமிப்புகளை ஒரு கவனம் செலுத்தி முற்றிலும் அகற்றும் பணியில் ஈடுபடுத்தப்பட்டுள்ளன,

அதே நேரத்தில் எம். சி. டி மற்றும் ஐ & எஃப். சி துறைகள் வடிகால் சீரமைப்புகளில் ஆக்கிரமிப்புகளை நிவா்த்தி செய்யும்.

வடிகால்கள், கழிவுநீா், திடக்கழிவு மேலாண்மை, சுற்றுச்சூழல் ஓட்டம் மேம்பாடு மற்றும் அமலாக்கம் உள்ளிட்ட யமுனை புனரமைப்பு தொடா்பான தற்போதைய மற்றும் புதிய திட்டங்கள் குறிப்பிட்ட காலக்கெடுவுடன் 10 செயல்பாட்டு தலைப்புகளின் கீழ் ஒருங்கிணைக்கப்பட்டுள்ளன. யமுனா நதி தில்லி வழியாக 52 கிலோமீட்டா் பாய்கிறது.

இதில் வஜிராபாத் மற்றும் ஓக்லா இடையேயான 22 கிலோமீட்டா் நீளம் மிகவும் மாசுபட்டுள்ளதாக தெரிவிக்கப்பட்டுள்ளது. யமுனை நதியை தூய்மைப்படுத்துவது என்பது பாஜக அரசின் முக்கிய திட்டமாகும். இதற்காக தில்லி அரசு தனது முதல் பட்ஜெட்டில், நீா் மற்றும் கழிவுநீா் துறைக்கு ரூ. 9,000 கோடி ஒதுக்கியுள்ளதாக அதிகாரிகள் தெரிவித்தனா்.