ரெஸ்டோபாா் கொலை வழக்கை சிபிஐக்கு மாற்றக் கோரி நீதிமன்றத்தை நாடுவோம்: நாராயணசாமி பேட்டி

புதுச்சேரி: ‘ரெஸ்டோபாா்’ கொலை வழக்கை சிபிஐ விசாரணைக்கு மாற்றக் கோரி காங்கிரஸ் கட்சி சாா்பில் உயா்நீதிமன்றத்தை நாடுவோம் என்று அக்கட்சியின் மூத்தத் தலைவரும் முன்னாள் முதல்வருமான வி.நாராயணசாமி கூறினாா்.

புதுச்சேரியில் ரெஸ்டோபாரில் (நடனத்துடன் கூடிய மது அருந்தும் கேளிக்கை விடுதி) ஞாயிற்றுக்கிழமை அதிகாலை நடைபெற்ற மோதலில் கல்லூரி மாணவா் குத்திக்கொலை செய்யப்பட்ட நிகழ்வு பரபரப்பை ஏற்படுத்தியுள்ள நிலையில், இந்த சம்பவம் தொடா்பாக, முன்னாள் முதல்வா் நாராயணசாமி திங்கள்கிழமை புதுச்சேரியில் செய்தியாளா்களிடம் கூறியதாவது:

புதுச்சேரிக்கு பிறந்தநாளைக் கொண்டாட வந்தபோது ரெஸ்டோபாரில் கல்லூரி மாணவா் குத்திக் கொலை செய்யப்பட்டுள்ளாா். மற்றொரு மாணவா் மருத்துவமனையில் உயிருக்குப் போராடிக் கொண்டிருக்கிறாா். புதுச்சேயில் காங்கிரஸ் ஆட்சியில் இருந்தபோது ஒரு ரெஸ்டோபாருக்குக் கூட அனுமதி கொடுக்கவில்லை. இப்போதைய என்.ஆா்.காங்கிரஸ்- பாஜக கூட்டணி ஆட்சியில்தான் சுற்றுலா என்ற பெயரில் ரெஸ்டோபாா்களுக்கு முறைகேடாக அனுமதி அளிக்கப்பட்டுள்ளது. இவை பெரும்பாலும் குடியிருப்புகள், மதவழிபாட்டுத்தலங்களுக்கு அருகில் உள்ளன. இப்போது கொலை நடந்த

ரெஸ்டோபாரின் உரிமையாளா்களில் ஒருவா் முதல்வா் ரங்கசாமிக்கு நெருங்கியவா். இதனால் இந்த வழக்கில் பாதிக்கப்பட்டவா்களைக் காவல்துறை மிரட்டியுள்ளது.

நோ்மையான விசாரணை நடக்காது:

மேலும் இந்த வழக்கு விசாரணையை புதுச்சேரி பெரியக்கடை போலீஸாா் நோ்மையான முறையில் நடத்த மாட்டாா்கள் என்றே தெரிகிறது. இதனால் இந்த வழக்கை சிபிஐ விசாரணைக்கு மாற்ற வேண்டும். இது தொடா்பாக துணைநிலை ஆளுநரை புதன்கிழமை சந்தித்து மனு அளிப்போம். அதன் பிறகும் சிபிஐ விசாரணைக்கு உத்தரவிடவில்லையென்றால் சென்னை உயா்நீதிமன்றத்தில் மனு தாக்கல் செய்வோம். இந்த வழக்கை சிபிஐ விசாரணைக்கு மாற்ற அந்த மனுவில் வலியுறுத்துவோம் .

மேலும் காவல்துறையினா் சுந்திரமாகச் செயல்படாமல் இருப்பதற்குக் காரணம் புதுவை முதல்வரும், மாநில உள்துறை அமைச்சா் ஆ. நமச்சிவாயமும்தான். எனவே, அவா்கள் தங்கள் பதவியை ராஜிநாமா செய்ய வேண்டும். மேலும், சம்பவம் நடந்துள்ள பகுதி பொதுப்பணித்துறை அமைச்சா் க.லட்சுமிநாராயணின் ராஜ்பவன் தொகுதியில் வருகிறது. அவரும் இச்சம்பவத்துக்கு பொறுப்பு ஏற்க வேண்டும். . காவலா்கள் ரெஸ்டோபாரின் அடிமைகளாக மாறிவிட்டனா். இந்த ரெஸ்டோபாா் மட்டுமல்ல, புதுவையில் உள்ளஅனைத்து ரெஸ்டோபாா்களிலும் இதே நிலைமைதான் உள்ளது என்றாா் நாராயணசாமி. இப் பேட்டியின்போது முன்னாள்அரசு கொறடா அனந்தராமன், வழக்குரைஞா் மருதுபாண்டியன் உள்ளிட்ட காங்கிரஸ் நிா்வாகிகள் உடனிருந்தனா்.