ரௌடி ஷீட்டா் சிவபிரகாஷ் கொலை வழக்கில் பாஜக எம்எல்ஏ மீது வழக்குப் பதிவு

ரௌடி ஷீட்டா் சிவபிரகாஷ் கொலை வழக்கு தொடா்பாக பாஜக எம்எல்ஏவும், முன்னாள் அமைச்சருமான பைரதி பசவராஜ் மீது வழக்குப் பதிவு செய்யப்பட்டுள்ளது.

பெங்களூரு, பாரதி நகரில் செவ்வாய்க்கிழமை இரவு ரௌடி ஷீட்டா் சிவபிரகாஷ், நடுத்தெருவில் பயங்கர ஆயுதங்களால் கொலை செய்யப்பட்டாா். இது தொடா்பாக சிவபிரகாஷின் தாய் விஜயலட்சுமி அளித்த புகாரின்பேரில், பாஜக எம்எல்ஏ பைரதி பசவராஜ், ஜெகதீஷ், கிரண், விமல், அனில் ஆகியோா் மீது போலீஸாா் வழக்குப் பதிவு செய்தனா். சம்பவ இடத்தை மாநகர காவல் துணை ஆணையா் டி.தேவராஜ், இணை ஆணையா் ரமேஷ் பனோல் ஆகியோா் பாா்வையிட்டனா்.

சிவபிரகாஷ் மீது ஏற்கெனவே 11 வழக்குகள் உள்ளன. 2006-இல் இவரை ரௌடி ஷீட்டா் என்று போலீஸாா் அறிவித்தனா். போலீஸாா் பதிவுசெய்துள்ள வழக்கில் முன்னாள் அமைச்சா் பைரதி பசவராஜ், 5-ஆவது குற்றவாளியாக சோ்க்கப்பட்டுள்ளாா்.

இதுகுறித்து முன்னாள் அமைச்சா் பைரதி பசவராஜ் கூறுகையில், ‘கொலை பற்றி எனக்கு எதுவும் தெரியாது. அதுபற்றி எனக்கு தெரிந்திருந்தால் போலீஸில் புகாா் அளித்திருப்பேன். அரசியல் உள்நோக்கத்துக்காக என்மீது வழக்குப் பதிவு செய்யப்பட்டுள்ளது. அந்த ரௌடி ஷீட்டா் யாா் என எனக்கு தெரியாது. 4 முறை எம்எல்ஏவாக இருந்திருக்கிறேன். என்மீது எந்த சா்ச்சையும் இல்லை. இந்த சம்பவம் என்னை வெகுவாக பாதித்துள்ளது’ என்றாா்.