வக்ஃப் சட்டத் திருத்த நகல் எரிப்பு போராட்டம்

மதுரையில் எஸ்டிபிஐ கட்சியின் சாா்பில், மத்திய அரசு நாடாளுமன்றத்தில் அறிமுகப்படுத்தியுள்ள வக்ஃப் சட்டத் திருத்த நகல் எரிப்பு போராட்டம் வியாழக்கிழமை நடைபெற்றது.

மத்திய அரசு சாா்பில் மக்களவையில் தாக்கல் செய்யப்பட்ட வக்ஃப் வாரிய சட்ட திருத்த மசோதாவை திரும்பப் பெற வலியுறுத்தி, எஸ்டிபிஐ கட்சியின் ஒருங்கிணைந்த மதுரை மாவட்டம் சாா்பில் இந்த போராட்டம் நடைபெற்றது.

மதுரை முனிச்சாலை ஓபுளாபடித்துரை பகுதியில் நடைபெற்ற இந்தப் போராட்டத்துக்கு கட்சியின் தெற்கு மாவட்ட துணைத் தலைவா் அபுதாஹிா் தலைமை வகித்தாா். வடக்கு மாவட்ட அமைப்பு பொதுச் செயலா் பக்ருதீன் வரவேற்புரையாற்றினாா். தெற்கு மாவட்டத் தலைவா் சீமான் சிக்கந்தா், வடக்கு மாவட்டத் தலைவா் பிலால்தீன் ஆகியோா் கண்டன உரையாற்றினா். தெற்கு மாவட்ட செயற்குழு உறுப்பினா் சைபுல்லா போராட்டத்தை விளக்கிப் பேசினாா். தெற்கு தொகுதிச் செயலா் சம்சு அப்துல்லா நன்றி கூறினாா். இதில் நூற்றுக்கும் மேற்பட்டோா் பங்கேற்றனா்.