வக்ஃப் வாரிய சொத்து விவகாரம் குறித்து உண்மை நிலையைக் கண்டறிய வந்தேன் என வக்ஃப் திருத்தச் சட்ட மசோதாவின் நாடாளுமன்ற கூட்டுக்குழு தலைவா் ஜகதாம்பிகா பால் தெரிவித்தாா்.
விஜயபுரா உள்ளிட்ட வடகா்நாடக மாநிலங்களில் விவசாயிகளுக்கு சொந்தமான நிலங்கள் வக்ஃப் வாரியத்துக்கு சொந்தமானது எனவும், உடனடியாக நிலத்தை காலி செய்யுமாறும் வருவாய்த் துறை மூலம் வக்ஃப் வாரியம் நோட்டீஸ் அனுப்பியிருந்தது. இதற்கு விவசாயிகள் கடும் எதிா்ப்புத் தெரிவித்து போராட்டம் நடத்தினா். விவசாயிகளின் போராட்டத்துக்கு ஆதரவு தெரிவித்த பாஜக, மஜத உள்ளிட்ட கட்சிகள், மாநில அரசின் நடவடிக்கையை கடுமையாக கண்டித்தன.
இந்நிலையில், அண்மையில் கூடிய கா்நாடக அமைச்சரவை, வக்ஃப் வாரிய சொத்துகள் தொடா்பாக விவசாயிகளுக்கு வழங்கப்பட்டிருந்த நோட்டீஸை திரும்பப் பெற ஒப்புதல் அளித்திருந்தது. இதில் திருப்தி அடையாத விவசாயிகள், போராட்டத்தை தீவிரப்படுத்தினா். கடந்த 4 நாள்களாக விவசாயிகள் காலவரையற்ற போராட்டத்தில் ஈடுபட்டு வந்தனா்.
இந்நிலையில், ஹுப்பள்ளிக்கு வியாழக்கிழமை வருகை தந்த வக்ஃப் திருத்தச் சட்ட மசோதாவின் நாடாளுமன்ற கூட்டுக்குழு தலைவா் ஜகதாம்பிகா பால், போராட்டத்தில் ஈடுபட்ட விவசாயிகளை சமாதானப்படுத்தி, பிரச்னைக்கு தீா்வுகாண்பதாக வாக்குறுதி அளித்தாா். இதைத் தொடா்ந்து, விவசாயிகள் போராட்டத்தைக் கைவிட்டனா்.
இதுகுறித்து ஹுப்பள்ளியில் வியாழக்கிழமை செய்தியாளா்களிடம் வக்ஃப் திருத்தச் சட்ட மசோதாவின் நாடாளுமன்ற கூட்டுக்குழு தலைவா் ஜகதாம்பிகா பால் கூறியதாவது:
நாடாளுமன்ற கூட்டுக்குழுவின் தலைவராக, வக்ஃப் வாரிய சொத்து என்று நிலத்தை இழந்துள்ள விவசாயிகளைச் சந்தித்து உண்மை கண்டறிவதற்காக நான் வந்திருக்கிறேன். 50 முதல் 70 ஆண்டுகளாக விவசாயிகளுக்கு சொந்தமான நிலத்தை திடீரென தங்களுக்கு சொந்தமான சொத்து என்று வக்ஃப் வாரியம் கூறியுள்ளது எப்படி?
விவசாய சங்கத்தினா் என்னை விமான நிலையத்தில் சந்தித்து குறைகளைக் கூறினா். வக்ஃப் வாரியம் சொந்தம் கொண்டாடும் நிலங்களுக்கான பத்திரம் அல்லது பட்டா இருக்கிா என்று விவசாயிகளைக் கேட்டேன். தாங்கள் அந்த நிலத்துக்கு சொந்தக்காரா்கள் என்றுகூறிய பிறகும், வக்ஃப் வாரியம் நிலத்துக்கு உரிமை கோருவதாக கூறினா்.
விவசாயிகளின் பரிதாப நிலை குறித்து பாஜக எம்.பி.யும், குழுவின் உறுப்பினருமான தேஜஸ்வி சூா்யா என்னிடம் எடுத்துக் கூறினாா். சில வரலாற்றுச் சிறப்பு வாய்ந்த கட்டடங்கள் அமைந்துள்ள நிலங்களுக்கு வக்ஃப் வாரியம் சொந்தம் கொண்டாடுவதாக கூறினாா். அவரது அழைப்பின்பேரில் ஹுப்பள்ளிக்கு வந்துள்ளேன்.
விஜயபுரா, பெலகாவிக்கும் சென்று விவசாயிகளைச் சந்தித்து குறைகளைக் கேட்டறிவேன். உண்மையைக் கண்டறிவதற்காக இந்தக் குழு அமைக்கப்பட்டுள்ளது. பாதிக்கப்பட்ட அனைவரையும் சந்தித்து குறைகளைக் கேட்டறிவேன் என்றாா்.
இதுகுறித்து துணைமுதல்வா் டி.கே.சிவகுமாா் கூறியதாவது:
வருகை தந்துள்ளது நாடாளுமன்ற கூட்டுக்குழு அல்ல. பாஜக உறுப்பினா்கள் மட்டுமே வந்துள்ளனா். இது நாடகக் குழு. நாடாளுமன்ற கூட்டுக்குழு என்றால் எல்லா உறுப்பினா்களும் வரவேண்டும். உடன் அரசு அதிகாரிகள் வரவேண்டும். ஆனால், குழுவின் தலைவா் மட்டுமே வந்துள்ளாா். பாஜக எம்.பி.யுடன் கட்சி வேலையாக அவா் கா்நாடகம் வந்துள்ளாா்.
விவசாயிகளின் நிலத்தை வக்ஃப் எடுத்துக்கொள்ளும் பேச்சுக்கே இடமில்லை. விவசாயிகளை காங்கிரஸ் அரசு பாதுகாக்கும். ஒருசில அதிகாரிகள் செய்த தவறால், இந்த நிலைமை ஏற்பட்டுள்ளது. இதை சரிசெய்து விவசாயிகளை காப்போம் என்றாா்.
