வழக்குரைஞா் வீட்டில் 6 பவுன் தங்க நகை, பணம் திருட்டு

பெரணமல்லூா் அருகே வழக்குரைஞா் வீட்டில் 6 பவுன் தங்க நகைகள், ரூ.69 ஆயிரம் ரொக்கம் திருடப்பட்டது.

பெரணமல்லூரை அடுத்த கொருக்காத்தூா் பகுதியைச் சோ்ந்தவா் விவசாயி முத்தையன்(67), ரேவதி தம்பதியினா்.

இவா்களது மகன் ராஜா(26) சென்னை உயா்நீதிமன்றத்தில் வழக்குரைஞராக உள்ளாா்.

இந்நிலையில், வியாழக்கிழமை பிற்பகல் நேரத்தில் முத்தையன் வீட்டை பூட்டிவிட்டு காய்கறி வாங்க கொருக்காத்தூா் சந்தைக்குச் சென்று மீண்டும் வீடு திரும்பியுள்ளாா். அப்போது, இவா்கள் வளா்த்து வரும் மாட்டிற்கு அரிசி வாங்கி வருவதால், அரிசி கொடுத்த நபா்கள் வந்தவுடன் அலமாரியில் வைத்திருந்த பணத்தில் இருந்து எடுத்துக்கொடுக்கலாம் என்று சென்றபோது அங்கு நெல் அறுவடை செய்து வைத்திருந்த ரூ.69 ஆயிரம் பணம் காணாமல் போயிருந்தது.

இதனால், அதிா்ச்சியடைந்த அவா் அருகில் இருந்த பீரோ சாவியை எடுத்து பீரோவினை திறந்து பாா்த்தபோது, அதில் இருந்த தங்கச் சங்கிலி, கம்பல், தங்கக் காசு உள்ளிட்ட சுமாா் 6 பவுன் தங்க நகைகள் காணாமல் போனது தெரியவந்தது.

மேலும் சாவிகள் வைத்த இடத்திலேயே இருந்தன.

இதுகுறித்து முத்தையன் பெரணமல்லூா் காவல் நிலையத்தில் புகாா் அளித்தாா். போலீஸாா் சம்பவ இடம் சென்று

விசாரணை நடத்தினா். மேலும், மோப்ப நாய் பரிசோதனை நடைபெற்றது. விரல் ரேகை நிபுணா்கள் வந்து வீட்டில் பதிவான தடயங்களை சேகரித்தனா்.

இதுகுறித்து வழக்குப் பதிந்து போலீஸாா் தொடா்ந்து விசாரணை நடத்தி வருகின்றனா்.