திருவண்ணாமலை மாவட்டம், ஆரணி புதுக்காமூா் பகுதியில் உள்ள புத்திரகாமேட்டீஸ்வரா் கோயிலில் பாலாலய கும்பாபிஷேகம் வியாழக்கிழமை நடைபெற்றது.
சுமாா் 1000 ஆண்டுகள் பழைமை வாய்ந்த இந்தக் கோயிலில் திருப்பணி மேற்கொள்வதற்காக தமிழக அரசு சாா்பில் ரூ.ஒரு கோடியே 55 லட்சம் சிறப்பு நிதி ஒதுக்கீடு,
கடந்த மாதம் 22-ஆம் தேதி முதல்வா் காணொலிக் காட்சி வாயிலாக பணியை தொடங்கிவைத்தாா்.
அன்றைய தினமே தொகுதி எம்பி எம். எஸ். தரணிவேந்தன் கோயில் வளாகத்தில் அடிக்கல் நாட்டி விழாவை நடத்தி வைத்தாா்.
தொடா்ந்து ஆகம விதிப்படி பாலாலய கும்பாபிஷேக விழா
கடந்த 1-ஆம் தேதி முதல் தொடா்ந்து 4 கால சிறப்பு யாக பூஜைகள் வேத விற்பன்னா்களால் நடத்தப்பட்டது.
300-க்கும் மேற்பட்ட கலசங்கள் வைக்கப்பட்டு கோயில் வளாகத்தில் உள்ள பரிவார சுவாமிகள், கருவறை சுவாமிகள், விமானங்கள், கொடி மரங்கள் என அனைத்து தெய்வங்களையும் அத்திப்பலகையில் அமைக்கப்பட்டு கருவறை புத்திரகாமேட்டீஸ்வரா், பெரியநாயகி அம்பாள், சண்டிகேஸ்வரா் நந்தியம்பெருமான், பலிபீடம் ஆகிய சுவாமிகளை மட்டும் பாலாலய அளவிற்காக சிறிய அளவில் லிங்கம், அம்பாள் பிரதிஷ்டை செய்யப்பட்டு, கலச நீரினால் பாலாலய கும்பாபிஷேகம் நடைபெற்றது.
விழாவில் ரத்தனகிரி பாலமுருகன் அடிமை சுவாமிகள், கலவை சச்சிதானந்த சுவாமிகள், ஜோதிடா் ரா.குமரேசன் ஆகியோா் யாக பூஜைகளை தொடங்கி வைத்தனா்.
விழாவில் சேவூா் எஸ். ராமச்சந்திரன் எம்எல்ஏ, நகா்மன்றத் தலைவா் ஏ. சி.மணி, துணைத் தலைவா் பாரி பி. பாபு, தமிழ்நாடு தொழிலாளா் திறன் மேம்பாட்டு உறுப்பினா் எஸ். எஸ்.அன்பழகன், அதிமுக நகரச் செயலா் அசோக்குமாா், ஒன்றியச் செயலா்கள் ஜி .வி. கஜேந்திரன், ஜெயபிரகாஷ் உள்ளிட்டோா் கலந்து கொண்டனா்.
