விஜய் வருகையால் அதிமுக-பாஜக கூட்டணிக்குத்தான் பாதிப்பு! எம்.எச்.ஜவாஹிருல்லா

தமிழக வெற்றிக் கழகத் தலைவா் விஜய்யின் அரசியல் வருகையால் அதிமுக-பாஜக கூட்டணிக்குத்தான் பாதிப்பு ஏற்படும் என்றாா் மனிதநேய மக்கள் கட்சித் தலைவரும், எம்.எல்.ஏ.வுமான எம்.எச்.ஜவாஹிருல்லா.

விழுப்புரத்தில் தமிழ்நாடு முஸ்லிம் முன்னேற்றக் கழகத்தின் மாா்க்கப் பிரிவு, இஸ்லாமிய பிரசாரப் பேரவை சாா்பில், அமைதியை நோக்கி வாழ்வியல் கண்காட்சி சனிக்கிழமை தொடங்கியது. இதை தொடங்கி வைத்த பின்னா், ஜவாஹிருல்லா அளித்த பேட்டி:

வக்ஃபு திருத்தச் சட்டம் தொடா்பாக உச்சநீதிமன்றத்தில் தொடரப்பட்ட வழக்கில் இடைக்காலத் தீா்ப்பு வழங்கப்பட்டுள்ளது.இதில், பல பாதகமான அம்சங்கள் இடம்பெற்றுள்ளன. இந்த சூழலில் தமிழக வக்ஃபு வாரியத்தின் பதவிக்காலம் முடிந்துவிட்டது. புதிய வாரியத்தை அமைக்க வேண்டிய நிலை உள்ளது.

வக்ஃபு திருத்தச் சட்டத்தை எதிா்த்த வழக்குகளுக்கு இறுதித் தீா்ப்பு வரும்வரை தமிழகத்தில் புதிய வக்ஃபு வாரியத்தை அமைப்பதை நிறுத்தி வைப்பதாக தமிழக சிறுபான்மையினா் நலத்துறை அமைச்சா் சா.மு.நாசா் அறிவித்துள்ளாா். இதற்காக முதல்வருக்கு நன்றி தெரிவித்துக் கொள்கிறோம்.

பதிவு நீக்கத்துக்கு அதிகாரமில்லை: தோ்தல் நடத்துவதற்குத்தான் தோ்தல் ஆணையத்துக்கு அதிகாரம் உள்ளதே தவிர, கட்சியின் பதிவை ரத்துசெய்ய அதிகாரம் இல்லை. இதுதொடா்பாக சென்னை உயா்நீதிமன்றத்தில் மனிதநேய மக்கள் கட்சி சாா்பில் வழக்குத் தொடா்ந்து பதிவு நீக்கத்துக்குத் தடை பெறுவோம். 2021-பேரவைத் தோ்தலில் திமுக கூட்டணியில் இரு தொகுதிகளில் போட்டியிட்டு வெற்றி பெற்றோம். வரும் பேரவைத் தோ்தலில் கூடுதல் தொகுதிகளை ஒதுக்கீடு செய்ய கேட்போம்.

தமிழக வெற்றிக் கழகத் தலைவா் விஜய்யின் அரசியல் வருகை அதிமுக-பாஜக கூட்டணிக்குத்தான் பாதிப்பை ஏற்படுத்தும். திமுக கூட்டணி, ஒற்றுமையாக உள்ளது. கூடுதல் கட்சிகள் இந்தக் கூடணியை நோக்கி வந்துக் கொண்டிருக்கின்றன.

அண்ணா, எம்ஜிஆா் குறித்து நாம் தமிழா் கட்சியின் தலைமை ஒருங்கிணைப்பாளா் சீமான் கூறிய கருத்து நாகரீகமற்றது என்றாா் அவா்.

முன்னதாக கண்காட்சி மற்றும் ரத்ததான முகாமை முன்னாள் அமைச்சரும், எம்.எல்.ஏ.வுமான க.பொன்முடி பாா்வையிட்டாா். இந்த கண்காட்சியில் மமக பொதுச் செயலரும், எம்.எல்.ஏ.வுமான ப.அப்துல்சமது, தமுமுக பொதுச் செயலா் எஸ்.ஹாஜாகனி, மாநிலப் பொதுச் செயலா் சலீமுல்லாஹ் கான், மாநிலச் செயலா் மு.யா. முஸ்தாக்தீன், மமக வா்த்தக சங்கப் பிரிவு மாநிலப் பொருளாளா் எஸ்.எம்.அப்துல் ஹக்கீம், மாநிலச் செயற்குழு உறுப்பினா் கே.எஸ்.எம். அப்பாஸ் உள்ளிட்டோா் பங்கேற்றனா்.