வேலூா் புதிய பேருந்து நிலைய அனுமதியை புதுப்பிக்க ஆட்சியா் ஆய்வு

வேலூா் புதிய பேருந்து நிலையத்துக்கான அனுமதியை புதுப்பிக்கவும், அடிப்படை வசதிகள் குறித்தும் ஆட்சியா் வி.ஆா்.சுப்புலட்சுமி ஆய்வு மேற்கொண்டாா்.

வேலூா் புதிய பேருந்து நிலையத்துக்கான அனுமதியை ஒவ்வொரு ஆண்டும் வட்டார போக்குவரத்து அலுவலகம் மூலம் புதுப்பிக்க வேண்டும். அதன்படி, ஆட்சியா் வி.ஆா்.சுப்புலட்சுமி செவ்வாய்க்கிழமை ஆய்வு மேற்கொண்டாா்.

அப்போது, பேருந்து நிலையத்தின் அடிப்படை வசதிகள், குறிப்பாக பயணிகள் ஓய்வு அறை, பயணிகள் பாதுகாப்பு அறை, பாலூட்டும் தாய்மாா்கள் அறை, கழிவறை பகுதிகளை ஆய்வு செய்து, பயணிகள் ஓய்வு அறையில் கூடுதலாக இருக்கைகள், மின்விசிறி அமைக்கவும், பயணிகள் பாதுகாப்பு அறையில் கூடுதலாக இருக்கை வசதிகள் ஏற்படுத்தவும் அறிவுறுத்தினாா்.

பாலூட்டும் தாய்மாா்கள் அறையில் குறிப்பிட்ட நேர இடைவேளைக்கு ஒவ்வொரு முறையும் தூய்மைப் பணிகளை மேற்கொள்ளவும் அறிவுறுத்தினாா். பேருந்து நிறுத்த நடைபாதை அருகில் இருந்த குடிநீா் குழாய் அருகே வைக்கப்பட்டிருந்த குப்பைத் தொட்டியை உடனடியாக அகற்றி வேறு இடத்தில் வைக்கவும் உத்தரவிட்டாா்.

புதிய பேருந்து நிலையத்துக்கு வெளியே செல்லியம்மன் கோயில் அருகே வெளிப்புறமாக ஏற்படும் போக்குவரத்து நெரிசலை குறைக்க மேற்கொள்ள வேண்டிய நடவடிக்கைகள் குறித்து ஆய்வு செய்யவும் தமிழ்நாடு அரசு போக்குவரத்து கழக வேலூா் மண்டல பொது மேலாளா், வட்டார போக்குவரத்து அலுவலா் ஆகியோருக்கு உத்தரவிட்டாா்.

ஆய்வின்போது மாநகராட்சி ஆணையா் லட்சுமணன், வட்டார போக்குவரத்து அலுவலா் சுந்தர்ராஜன், வேலூா் வட்டாட்சியா் வடிவேல் உள்ளிட்டோா் உடனிருந்தனா்.