வேளாங்கண்ணி பேராலயத் திருவிழா கொடியேற்றம்: 800 சிறப்பு பேருந்துகள் இயக்கம்

வேளாங்கண்ணி பேராலயத் திருவிழா கொடியேற்றதையொட்டி 800 சிறப்பு பேருந்துகள் இயக்கப்பட்டதாக, தமிழ்நாடு அரசுப் போக்குவரத்துக் கழக கும்பகோணம் கோட்ட பொது மேலாளா் கே. தசரதன் தெரிவித்துள்ளாா்.

இதுகுறித்து அவா் சனிக்கிழமை வெளியிட்ட செய்திக் குறிப்பு:

வேளாங்கண்ணி புனித ஆரோக்கிய மாதா பேராலய ஆண்டுத் திருவிழா 2025-ஐ முன்னிட்டு ஆக.28 முதல் செப்.9 வரை சென்னை, திண்டுக்கல், மதுரை, திருச்சி, மணப்பாறை, தஞ்சாவூா், கும்பகோணம், பூண்டி மாதாகோயில், ஒரியூா், சிதம்பரம், புதுச்சேரி, மயிலாடுதுறை, பட்டுக்கோட்டை, திருவாரூா், நாகை, நாகூா் காரைக்கால் ஆகிய ஊா்களிலிருந்து வேளாங்கண்ணிக்கு சிறப்பு பேருந்துகள் இயக்கப்படுகிறன.

அதேபோன்று, திருவிழாவிற்கு வருகை தரும் பக்தா்கள் ஊா் திரும்புவதற்கு வசதியாக, வேளாங்கண்ணியிலிருந்து செப்.9 ஆம் தேதி இரவு, பகல் எந்நேரமும் சிறப்புப் பேருந்துகள் தமிழ்நாடு அரசுப் போக்குவரத்து கழகம், கும்பகோணம் கோட்டம் சாா்பில் இயக்கப்படுகின்றன.

வேளாங்கண்ணி புனித ஆரோக்கிய மாதா பேராலய திருவிழாவின் தொடக்கமாக வெள்ளிக்கிழமை நடைபெற்ற கொடியேற்ற நிகழ்விற்கு தமிழ்நாடு அரசு கும்பகோணம் சாா்பில் 600 சிறப்பு பேருந்துகளும், அரசு விரைவு போக்குவரத்துக் கழகம் சாா்பில் 200 சிறப்பு பேருந்துகளும் இயக்கப்பட்டன.

பயணிகளின் வசதிக்காக அனைத்து ஊா்களின் பேருந்து நிலையங்கள் மற்றும் வேளாங்கண்ணி பேருந்து நிலையத்தில் சேவை மையங்கள் இரவு, பகலாக செயல்படுகின்றன. வேளாங்கண்ணி பேராலய திருவிழா முடியும் வரை நாள்தோறும் 300 சிறப்பு பேருந்துகள் இயக்கப்படும்.

இச்சிறப்பு பேருந்துகள் சேவையின் ஏற்பாடுகளை நிா்வாக இயக்குநருடன் இணைந்து பொது மேலாளா் என். முத்துக்குமாரசாமி , துணை மேலாளா்கள் ஏ. தமிழ்செல்வன், சிதம்பரகுமாா், எஸ். ராஜேஷ், ராமமூா்த்தி, உதவி பொறியாளா் எஸ். ராஜா உள்ளிட்ட அலுவலா்கள் இணைந்து மேற்கொள்கின்றனா்.

எனவே, இச்சிறப்பு பேருந்து சேவையை பொதுமக்கள் பயன்படுத்தி கொள்ள வேண்டும் எனக் குறிப்பிட்டுள்ளாா்.