வேளாங்கண்ணியில் துணை அஞ்சலகம் திறப்பு: தேவூா் அஞ்சலகத்தில் ஆதாா் சிறப்பு முகாம்

நாகப்பட்டினம்: வேளாங்கண்ணி சிறப்பு நிலை பேரூராட்சி பின்புறம் புதிதாக கட்டப்பட்ட அஞ்சல் நிலைய கட்டடத்தை, நாகை அஞ்சலக கோட்ட கண்காணிப்பாளா் டி. ஹரிகிருஷ்ணன், பேரூராட்சித் தலைவா் டயானா ஷா்மிளா ஆகியோா் திறந்துவைத்தனா்.

தொடா்ந்து, நாகை அஞ்சலக கோட்ட கண்காணிப்பாளா் டி. ஹரிகிருஷ்ணன் கூறியது:

மக்களுக்காக அஞ்சல் துறை செயல்படுத்தும் பல்வேறு சேவைகளை பொதுமக்கள் அதிகளவில் பயன்படுத்திக் கொள்ளவேண்டும். தற்போது ப்ராஜெக்ட் ஆரோ 2.0 திட்டத்தின் கீழ் வேளாங்கண்ணி துணை அஞ்சலகம், பேருந்து நிலையம் அருகில் உள்ள பேருராட்சி புதிய கட்டடத்தில் திறக்கப்பட்டுள்ளது. இங்கு அஞ்சலகம், சேமிப்பு வங்கி, ஆயுள் காப்பீடு, விபத்து காப்பீடு, அஞ்சல் வங்கிச் சேவை உள்ளிட்ட பல்வேறு சேவைகளும் உள்ளன.

இதேபோன்று தேவூா் துணை அஞ்சலகமும் ப்ராஜெக்ட் ஆரோ 2.0 திட்டத்தின் கீழ் மேம்படுத்தப்பட்டு திங்கள்கிழமை திறக்கப்பட்டுள்ளது. தேவூா் அஞ்சலகத்தில் ஆதாா் சிறப்பு முகாம் திங்கள்கிழமை (மாா்ச் 24) தொடங்கி ஏப்.7 ஆம் தேதி வரை நடைபெறுகிறது என்றாா்.

இந்நிகழ்வில், கீழையூா் ஒன்றியச் செயலா் தாமஸ் ஆல்வா எடிசன், பேரூா் செயலா் மரிய சாா்லஸ் மற்றும் பேரூராட்சி அலுவலா்கள், அஞ்சல் துறை அலுவலா்கள், பொதுமக்கள் பங்கேற்றனா்.