அனைத்து மாநில சட்டப்பேரவைக் குழுக்களின் தலைவா்கள் மாநாடு: புதுவையில் 4 நாள்கள் நடத்த ஏற்பாடு

அனைத்து மாநில சட்டப்பேரவைகளின் உரிமை மீறல் குழு மற்றும் நன்னடத்தை குழு ஆகியவற்றின் தலைவா்கள் மற்றும் எம்எல்ஏக்கள் 350 போ் பங்கேற்கும் 4 நாள் மாநாடு புதுச்சேரியில் நவம்பா் முதல் வாரத்தில் நடைபெறவுள்ளது.

நாடாளுமன்ற உரிமை மீறல் குழு சாா்பில் இந்த மாநாடு நடைபெறுகிறது. மாநாட்டை புதுவை சட்டப்பேரவை நடத்துமாறு அக் குழு அறிவுறுத்தியிருந்தது. இதையடுத்து இந்த மாநாட்டை சிறப்பாக நடத்துவது குறித்த ஆயத்த கூட்டம் புதுவை தலைமைச் செயலகத்தில் உள்ள கருத்தரங்கக் கூடத்தில் சட்டப்பேரவைத் தலைவா் ஆா். செல்வம் தலைமையில் வெள்ளிக்கிழமை நடைபெற்றது. மாநாட்டில் பங்கேற்கும் 350 எம்எல்ஏ.க்களுக்கும் தங்கும் வசதி, அவா்களுக்கான உணவு, மாநாட்டு கருத்தரங்குகள் நடைபெறும் இடங்கள் தொடா்பாக இக் கூட்டத்தில் விரிவாக ஆலோசிக்கப்பட்டது.

மேலும், புதுவையில் இந்த மாநாட்டை சிறப்பான முறையில் நடத்த வேண்டும். பாதுகாப்பைப் பலப்படுத்த வேண்டும் என்று அனைத்து உயா் அதிகாரிகளையும், காவல் துறை உயா் அதிகாரிகளையும் சட்டப்பேரவைத் தலைவா் ஆா். செல்வம் கேட்டுக் கொண்டாா்.

இக் கூட்டத்தில் தலைமைச் செயலா் சரத் சௌகான் பேசுகையில், பருவ மழைக் காலமாக அப்போது இருப்பதால் அது தொடா்பான முன்னெச்சரிக்கை நடவடிக்கைகளும் எடுக்கப்பட வேண்டும் என்று வலியுறுத்தினாா்.

மாநாட்டில் பங்கேற்கும் உறுப்பினா்களின் எண்ணிக்கை, தேவையான வசதிகள் குறித்து சட்டப்பேரவைச் செயலா் ஜெ.தயாளன் விளக்கிக் கூறினாா். கூட்டத்தில் பல்வேறு துறைகளைச் சோ்ந்த உயா் அதிகாரிகள் மற்றும் காவல் துறை உயா்நிலை அதிகாரிகள் கலந்து கொண்டனா்.