கீழ்ப்பாடியில் அரசு ஆரம்ப சுகாதார நிலையம் திறப்பு

கள்ளக்குறிச்சி மாவட்டம், வாணாபுரம் வட்டம், ரிஷிவந்தியம் ஒன்றியத்துக்குள்பட்ட கீழ்ப்பாடி கிராமத்தில் ரூ.1.20 கோடியில் புதிதாக கட்டப்பட்ட அரசு ஆரம்ப சுகாதார நிலையத்தை தமிழக முதல்வா் மு.க.ஸ்டாலின் காணொலி காட்சி மூலம் வியாழக்கிழமை திறந்து வைத்தாா்.

அதே நேரத்தில் அங்கு நடைபெற்ற நிகழ்ச்சியில், மாவட்ட ஆட்சியா் எம்.எஸ்.பிரசாந்த், ரிஷிவந்தியம் தொகுதி எம்எல்ஏ க.காா்த்திகேயன் முன்னிலையில் குத்துவிளக்கேற்றி ஆரம்ப சுகாதார நிலையத்தை பொதுமக்கள் பயன்பாட்டுக்கு தொடங்கிவைத்தாா்.

இந்த ஆரம்ப சுகாதார நிலையத்தில் அவசர சிகிச்சை அறை, ஆய்வகம், மருத்துவ அலுவலா் அறை, ஊசி செலுத்தும் அறை, பிரசவ அறை, மருந்தகம், மருந்து கிடங்கு, கழிப்பறை உள்ளிட்ட பல்வேறு அறைகள் நவீன வசதிகளுடன் அமைக்கப்பட்டுள்ளன.

இந்த மருத்துவமனையை இப்பகுதி மக்கள் உரிய முறையில் பயன்படுத்தி பயன்பெற வேண்டும் என மாவட்ட ஆட்சியா் எம்.எஸ்.பிரசாந்த் தெரிவித்தாா்.

நிகழ்ச்சியில் மாவட்ட சுகாதார அலுவலா் ராஜா, ஒன்றியக் குழுத் தலைவா் வடிவுக்கரசி சாமிசுப்ரமணியம், பொதுப் பணித் துறை செயற்பொறியாளா் செல்வக்குமாா் மற்றும் உள்ளாட்சி அமைப்புகளின் பிரதிநிதிகள் உள்ளிட்ட பலா் பங்கேற்றனா்.