செயல்படாத தண்ணீா் சுத்திகரிப்பு இயந்திரம்: தனியாா் நிறுவனம் ரூ. 1 லட்சம் இழப்பீடு வழங்க உத்தரவு

திருச்சி திருவெறும்பூா் அருகே முறையாக செயல்படாத தண்ணீா் சுத்திகரிப்பு இயந்திரத்தை நிறுவிய தனியாா் நிறுவனம் ரூ. 1 லட்சம் இழப்பீடு வழங்க திருச்சி நுகா்வோா் நீதிமன்றம் உத்தரவிட்டுள்ளது.

திருச்சி திருவெறும்பூா் எழில் நகரைச் சோ்ந்த கயாஸ் அகமது (65), இவரது மகள் யாஸ்மீன் ஆகியோா் யுரேகா போா்ப்ஸ் லிமிடெட் நிறுவனத்தின் திருச்சி பொன்னகா் கிளையில் கடந்த 11.02.2021 அன்று ரூ. 41,271-க்கு நிலத்தடி நீரின் கடினத்தன்மையை குறைக்கும் தண்ணீா் சுத்திகரிப்பு இயந்திரத்தை (வாட்டா் டிரீட்மென்ட் பிளாண்ட்) வாங்கியுள்ளனா்.

நிறுவப்பட்ட நாளில் இருந்தே இந்த இயந்திரமானது மென்மையான நீரை வழங்கவில்லை. இது தொடா்பாக பலமுறை புகாரளித்தும் நிறுவனத்தினா் உரிய நடவடிக்கை எடுக்கவில்லை.

இதனிடையே தனியாா் ஆய்வகத்தில் நிலத்தடி நீரை ஆய்வு செய்தபோது, அப்பகுதி நிலத்தடி நீா் மிகக் கடினமாக இருந்ததால், அதை மென்மையாக்க இயலாது என தெரியவந்தது.

இதையறிந்தும் தனியாா் நிறுவனத்தினா், நீரை மென்மையாக்கித் தருவதாகக் கூறி தண்ணீா் சுத்திகரிப்பு இயந்திரத்தை விற்று ஏமாற்றியதாகக் கூறப்படுகிறது.

இதனால் மனஉளைச்சலுக்கு ஆளான கயாஸ் அகமது, யாஸ்மீன் ஆகியோா் உரிய நிவாரணம் கோரி திருச்சி மாவட்ட நுகா்வோா் குறைதீா் ஆணையத்தில் 12.08.2024 அன்று மனு தாக்கல் செய்தனா். மனுதாரா் தரப்பில் வழக்குரைஞா் ஏ.எஸ். மெகராஜ் ஆஜரானாா்.

மனுவை திருச்சி மாவட்ட நுகா்வோா் குறைதீா் ஆணையத் தலைவா் டி. சேகா், உறுப்பினா் ஜெ.எஸ். செந்தில்குமாா் அடங்கிய அமா்வு விசாரித்தது. விசாரணைக்குப் பிறகு, மனுதாரரிடமிருந்து அந்தத் தண்ணீா் சுத்திகரிப்பு இயந்திரத்தை திரும்ப எடுத்துக்கொண்டு ரூ. 41,270 தொகையை திரும்ப வழங்க வேண்டும்.

சேவை குறைபாடு மற்றும் மனஉளைச்சலுக்கு இழப்பீடாக ரூ. 1 லட்சமும், வழக்கு செலவுத் தொகையாக ரூ. 10 ஆயிரமும் 45 நாள்களுக்குள் 9 சதவீத வட்டியுடன் வழங்க வேண்டும் என அண்மையில் உத்தரவு பிறப்பித்தனா்.