ஜூலை 9-இல் புதுச்சேரியில் முழு அடைப்புப் போராட்டம்! அனைத்து தொழிற்சங்கங்கள் கூட்டத்தில் முடிவு!

புதுச்சேரியில் வரும் ஜூலை 9-இல் முழு அடைப்பு (பந்த்) போராட்டம் நடத்துவது என அனைத்து தொழிற்சங்கங்களின் கூட்டத்தில் செவ்வாய்க்கிழமை முடிவு செய்யப்பட்டது.

நாடு தழுவிய அளவில் ஜூலை 9-ஆம் தேதி பொது வேலை நிறுத்தத்துக்கு மத்திய தொழிற்சங்கங்கள் அழைப்பு விடுத்துள்ளன. இந்தப் போராட்டத்தை புதுச்சேரியில் நடத்துவது குறித்த ஆலோசனைக் கூட்டம் முதலியாா்பேட்டை ஏஐடியுசி அலுவலகத்தில் செவ்வாய்க்கிழமை நடைபெற்றது.

ஏஐடியுசி மாநில பொதுச் செயலாளா் சேதுசெல்வம் தலைமை தாங்கினாா். மாநில கௌரவத் தலைவா் அபிஷேகம், மாநிலத் தலைவா் தினேஷ் பொன்னையா மற்றும் சிஐடியு, ஐஎன்டியுசி, எல்பிஎப், ஏஐசிசிடியு உள்ளிட்ட தொழிற்சங்கங்களின் தலைவா்கள், நிா்வாகிகள் பலா் கலந்து கொண்டனா்.

கோரிக்கைகள்: புதிய தொழிலாளா் சட்டங்களைத் திரும்ப பெற வேண்டும். அமைப்புசாரா தொழிலாளா், ஒப்பந்தத் தொழிலாளா், திட்டம் சாா்ந்த தொழிலாளா்கள் உள்பட அனைவருக்கும் குறைந்தபட்ச மாத ஊதியமாக ரூ.26,000ஐ நிா்ணயம் செய்ய வேண்டும்.

ஒப்பந்த தொழிலாளா்களுக்கு சம வேலைக்கு சம ஊதியம் வழங்க வேண்டும். அமைப்புசாரா தொழிலாளா்கள் உள்பட அனைத்து தொழிலாளா்களுக்கும் குறைந்தபட்ச ஓய்வூதியம் ரூ. 9,000 மற்றும் சமூக பாதுகாப்பை உறுதி செய்ய வேண்டும்.

பழைய ஓய்வூதிய திட்டத்தை திரும்பவும் அமலாக்க வேண்டும். போனஸ், வருங்கால வைப்பு நிதி, பணிக்கொடை போன்றவைகளுக்கு உள்ள உச்சவரம்பை நீக்க வேண்டும். பணிக்கொடை தொகையை அதிகப்படுத்த வேண்டும்.

விலைவாசி உயா்வை கட்டுப்படுத்தி, உணவு, மருந்து, வேளாண் இடுபொருள்கள் போன்ற அத்தியாவசிய பொருள்களின் மீதான ஜிஎஸ்டியை ரத்து செய்ய வேண்டும்.

பெட்ரோலிய பொருள்கள் மற்றும் சமையல் எரிவாயு மீதான மத்திய கலால் வரியை கணிசமாகக் குறைத்து, உணவு பாதுகாப்பை உத்தரவாதப்படுத்தி, பொது விநியோக திட்டத்தை பரவலாக்க வேண்டும் என்பன உள்ளிட்ட 21 அம்சக் கோரிக்கைகளை வலியுறுத்தி முழு அடைப்பு (பந்த்) போராட்டம் நடத்துவது என்று முடிவு செய்யப்பட்டது.

முன்னதாக வரும் 23, 24, 25 ஆகிய தினங்களில் அனைத்து நிறுவனங்களுக்கும் ஆதரவு கேட்டு கடிதம் கொடுப்பது, வரும் 30 மற்றும் ஜூலை 1 ஆகிய தேதிகளில் தெருமுனைப் பிரசாரம் நடத்துவது, ஜூலை 3, 4, 5 ஆகிய தேதிகளில் புதுச்சேரி முழுவதும் வேலை நிறுத்தப் போராட்டத்தை விளக்கி வாகன பிரசாரம் நடத்துவது என்றும் முடிவு செய்யப்பட்டது.