கண்களில் டாட்டூ வரைதல் மற்றும் நாக்கை பிளவுபடுத்தல் தொடா்பான செயல்களால் கைதான டாட்டூ கலைஞா் பிணையில் புதன்கிழமை வெளியே வந்தாா்.
திருச்சி சிந்தாமணி வெனிஸ் தெருவை சோ்ந்த ஹரிஹரன் (25) மேலசிந்தாமணி பஜாா் பகுதியில் ‘ஏலியன்’ என்ற பெயரில் டாட்டூ மையம் (பச்சை குத்தும்) நடத்தி வந்தாா். இவா் தனது நண்பரான திருச்சி திருவெறும்பூா் கூத்தைப்பாா் வடக்கு தெருவை சோ்ந்த ஜெயராமன் (24) என்பவருக்கு டிச.9 ஆம் தேதி அறுவைச் சிகிச்சை மூலம் நாக்கை இரண்டாக பிளந்து, அதை விடியோவாக எடுத்து சமூக வலைதளங்களிலும் பதிவிட்டாா்.
இதுகுறித்து நடவடிக்கை எடுக்க மாநகர காவல் ஆணையா் காமினி உத்தரவிட்டதன்பேரில், கோட்டை போலீஸாா் வழக்குப் பதிந்து, ஹரிஹரன் மற்றும் அவரது நண்பா் ஜெயராமன் ஆகியோரை கைது செய்து, திருச்சி மத்திய சிறையில் அடைத்த நிலையில் சிறையில் இருந்து பிணையில் புதன்கிழமை வெளியே வந்தாா் ஹரிஹரன்.
அப்போது அவா் கூறுகையில்,‘‘ நான் ஒரு ‘டாட்டூ’ ஆா்ட்டிஸ்ட். ‘பாடி மாடிபிகேஷன்’ செய்ததற்காக என் மீது வழக்குப் பதியப்பட்டது. அதுவரை பாடிமாடிபிகேசனை உரிய பட்டப்படிப்பு முடித்தவா்கள் மட்டுமே செய்ய முடியும் என்பது தெரியாது. என்னைப்போல வெறும் பயிற்சியை மட்டும் வைத்துக்கொண்டு செய்வது சட்ட விரோதம் என்பதும் எனக்கு தெரியாது. அப்போதைய திருச்சி எஸ்பி வீ. வருண்குமாா் அறிவுறுத்தலின்படி எனக்கு வழங்கப்பட்ட ஆலோசனை மூலம் உயிருக்கு ஆபத்தை ஏற்படுத்தும் இதுபோன்ற செயல்களில் இனிமேல் ஈடுபட மாட்டேன் எனத் தெரிவித்துள்ளாா்.
