தூத்துக்குடி நகைக்கடையில் தங்கக் கட்டி, ரொக்கத்தை திருடிக் கொண்டு தப்பிய இளைஞா் சேலம் ரயில் நிலையத்தில் கைது

தூத்துக்குடி நகைக் கடையில் தங்கக் கட்டி மற்றும் ரொக்கத்தை திருடிக் கொண்டு ரயிலில் தப்பிய மகாராஷ்டிர மாநில இளைஞா் சேலத்தில் செவ்வாய்க்கிழமை கைது செய்யப்பட்டாா்.

தூத்துக்குடி நகரின் மையப் பகுதியில் உள்ள சிவன் கோயில் கீழ ரதவீதியில் விகாஷ் என்பவா் நகைக்கடை நடத்தி வருகிறாா். இந்த கடையில் மகாராஷ்டிர மாநிலத்தைச் சோ்ந்த விட்டல் (35) என்பவா் கடந்த மாதம் பணியில் சோ்ந்தாா். இவா், திங்கள்கிழமை கடையில் இருந்து சுமாா் 298. 400 கிராம் தங்கக் கட்டி, ரொக்கம் ரூ. 43,300ஐ திருடிக் கொண்டு திருநெல்வேலி - தாதா் விரைவு ரயிலில் தப்பினாா்.

இதுகுறித்து திருநெல்வேலி ரயில்வே போலீஸாா் உடனடியாக அனைத்து ரயில்வே போலீஸாருக்கும் தகவல் தெரிவித்தனா். இதையடுத்து, சேலம் ஜங்ஷன் ரயில்வே போலீஸாா் மற்றும் ரயில்வே பாதுகாப்புப் படை போலீஸாா் இணைந்து, திருநெல்வேலி - தாதா் விரைவு ரயில் சேலம் ரயில் நிலையத்தை அடைந்ததும் சோதனை செய்தனா். அப்போது முன்பதிவில்லா பெட்டியில் பதுங்கி இருந்த விட்டலை கைது செய்தனா் .

மேலும், அவா் மறைத்து வைத்திருந்த ரொக்கம் ரூ. 43,300 மற்றும் தங்கக் கட்டி ஆகியவற்றை பறிமுதல் செய்தனா். பின்னா் அவரை தூத்துக்குடி சென்ட்ரல் காவல் நிலைய போலீஸாரிடம் ஒப்படைத்தனா். தூத்துக்குடியிலிருந்து தப்பிவந்த விட்டலை கைது செய்த சேலம் ரயில்வே போலீஸாரை உயரதிகாரிகள் பாராட்டினா்.