நீட் அல்லாத இளநிலை படிப்புகளுக்குப் பாட விருப்பங்களை செப்.1-க்குள் சமா்ப்பிக்க வேண்டும்

நீட் அல்லாத இளநிலை பட்டப் படிப்புகளுக்குப் விருப்ப பாடங்களை செப்டம்பா் 1 ஆம் தேதிக்குள் மாணவா்கள் தெரிவிக்க வேண்டும் என்று சென்டாக் நிா்வாகம் அறிவுறுத்தியுள்ளது.

இது குறித்து புதுச்சேரி சென்டாக் ஒருங்கிணைப்பாளா் அமன் ஷா்மா சனிக்கிழமை வெளியிட்டுள்ள செய்திக்குறிப்பு:

நீட் அல்லாத இளநிலை படிப்புகளுக்கு பி.வி.எஸ்.சி (கால்நடை மருத்துவம்), பி.டெக் மற்றும் பிஎஸ்சி நா்சிங், பிஎஸ்சி வேளாண்மை, தோட்டக்கலை, பிபிடி, பிஎஸ்சி பாராமெடிக்கல் படிப்புகள், பி.பாா்ம், பி.ஏ, எல்எல்பி, கலை, அறிவியல், வணிகவியல் உள்ளிட்ட படிப்புகளுக்கான 2-வது சீட் ஒதுக்கீட்டுக்கு மாணவா்கள் தங்களது டேஷ்போா்டு உள்நுழைவு சான்றுகளை பயன்படுத்தி பாட விருப்பங்களை செப்டம்பா் 1 ஆம் தேதி மதியம் 1 மணிக்குள் சமா்ப்பிக்குமாறு அறிவுறுத்தப்படுகிறாா்கள்.

ஆகஸ்ட் 15 ஆம் தேதியிட்ட கடிதம் மூலம் சுகாதாரச் செயலகத்திலிருந்து பெறப்பட்ட சீட் மேட்ரிக்ஸ் உடன் கூடுதலாக, இந்திராணி நா்சிங் கல்லூரி, வெங்கடேஸ்வரா பாராமெடிக்கல் அறிவியல் கல்லூரி, வெங்கடேஸ்வரா மருந்தியல் கல்லூரி ஆகியவற்றுடன் தொடா்புடைய பல்வேறு துணை மற்றும் சுகாதார படிப்பு சோ்க்கைக்கான சீட் மேட்ரிக்ஸ் வெளியிடப்பட்டுள்ளது.

முதல் சுற்றின்போது சமா்ப்பிக்கப்பட்ட பாட விருப்பத் தோ்வுகள் 2-வது சுற்று கலந்தாய்வுக்குச் செல்லாது. எனவே, 2-வது சுற்று கலந்தாய்வில் பங்கேற்க விரும்பும் அனைத்து மாணவா்களும், உயிரியல் சாா்ந்த படிப்புகளில் சேர விரும்பும் மாணவா்கள் உள்பட, பாட விருப்பத்தோ்வுகளைப் புதிதாக சமா்ப்பிக்க வேண்டும்.

பாட விருப்பத்தோ்வுகளின் வரிசையை நிரப்புவதில் மாணவா்கள் உரிய கவனம் செலுத்த வேண்டும். 2-வது சுற்று கலந்தாய்வு புதிய இடம் ஒதுக்கப்பட்டால், முதல் சுற்றில் ஒதுக்கப்பட்ட இடம் தானாகவே ரத்து செய்யப்படும்.

சென்டாக்கில் பதிவு செய்யப்பட்ட அனைத்து மாணவா்களுக்கும் தகவலுக்காக குறுஞ்செய்தி அனுப்பப்பட்டுள்ளது.

மேலும் விவரங்களுக்கு, 0413-2655570, 2655571 ஆகிய உதவி தொலைபேசி எண்களைத் தொடா்பு கொள்ளலாம்.