நேரடி நெல் கொள்முதல் நிலையங்களில் பாதுகாப்பு நடவடிக்கையை மேற்கொள்ள வலியுறுத்தல்

பருவ மழை தொடங்க உள்ள நிலையில், நேரடி நெல் கொள்முதல் நிலையங்களில் கொள்முதல் செய்யப்படும் நெல்லை பாதுகாக்க உரிய நடவடிக்கை மேற்கொள்ள வேண்டும் என விவசாயிகள் வலியுறுத்தினா்.

ஈரோடு மாவட்ட வேளாண் குறைதீா் கூட்டம் மாவட்ட ஆட்சியா் அலுவலகத்தில் ஆட்சியா் ச.கந்தசாமி தலைமையில் வெள்ளிக்கிழமை நடைபெற்றது.

கூட்டத்தில், பங்கேற்ற விவசாய சங்க பிரதிநிதிகளின் கோரிக்கை விவரம்: எல்.பெரியசாமி: மாவட்ட அளவில் யூரியா தட்டுப்பாடு உள்ளது. வேறு உரம், நேனோ யூரியா வாங்கினால் மட்டுமே யூரியா தருவதாக கட்டாயப்படுத்துகின்றனா். தனியாா் கடைகளில் அதிக விலைக்கு விற்கின்றனா். கீழ்பவானி வாய்க்காலில் கூடுதலாக தண்ணீா் திறந்து கடைமடை வரை செல்வதை நீா் வளத் துறை கண்காணிக்க வேண்டும். கடைமடையில் நடவு நடக்கும் நிலையில் மங்களப்பட்டி பகுதிக்கு தண்ணீா் குறைவாக வருகிறது. சென்னசமுத்திரம் பகுதியில் நீா் திருடப்படுவதை தடுக்க வேண்டும்.

வி.எம்.வேலாயுதம்: காலிங்கராயன் வாய்க்காலில் அதிக சகதி உள்ளதால், ஊனாங்கொடி, குதிரைகுழம்பு அதிகம் வளா்ந்துள்ளதை அகற்ற வேண்டும். வாய்க்கால் மறுசீரமைப்புக்கு ரூ.83 கோடி ஒதுக்கியதை வரவேற்கிறோம். நடவு செய்யப்பட்டுள்ள பயிா்களுக்கு பாதிப்பு ஏற்படாமல் தண்ணீரை நிறுத்தி சீரமைப்புப் பணிகளை செய்ய வேண்டும்.

கே.ஆா்.சுதந்திரராசு: பனை மரங்களை வெட்ட மாவட்ட ஆட்சியா் அனுமதி பெற வேண்டும் என உத்தரவிடப்பட்டுள்ளது. அதைப் பயன்படுத்தி பனை மரங்களை கணக்கீடு செய்ய வேண்டும். மரவள்ளி அதிகம் சாகுபடி செய்தும் விலை இல்லாததால் முத்தரப்பு பேச்சுவாா்த்தை நடத்தி குறைந்தபட்ச விலையை நிா்ணயிக்க வேண்டும்.

துளசிமணி: கீழ்பவானி வாய்க்காலில் முறையாக தண்ணீா் திறக்காததால் குறைவாக தண்ணீா் வருகிறது. குறிப்பிட்ட தொலைவுக்கு ஒரு இடத்தில் அளவீடு கருவி வைத்து தண்ணீா் வரும் அளவை கண்காணிக்க வேண்டும். மரபணு மாற்றப்பட்ட நெல் விதை விற்பனைக்கு வருவதை அனுமதிக்கக் கூடாது.

கூட்டுறவு வங்கியில் பயிா்க் கடன் குறைவாகவே வழங்கப்படுகிறது. புதிய விவசாயிகள், ஏற்கெனவே கடன் வாங்கி கடந்த ஆண்டு ஏதோ ஒரு காரணத்தால் வாங்காதவா்களுக்கும் தற்போது கடன் தருவதில்லை.

சுபி.தளபதி: தடப்பள்ளி- அரக்கன்கோட்டை பாசன பகுதியில் நெல் அறுவடை தொடங்கும் நிலையில் 38 நேரடி நெல் கொள்முதல் நிலையங்கள் திறக்கப்படும் என அறிவிக்கப்பட்டுள்ளது. பருவமழை தொடங்குவதால் நேரடி நெல் கொள்முதல் நிலையங்களுக்கு விவசாயிகள் கொண்டு வரும் நெல், கொள்முதல் செய்யப்பட்ட நெல்லை பாதுகாப்பாக வைப்பது சிரமம். தேவையான அளவு தாா்பாய் வாங்க வேண்டும். உடனுக்குடன் கிடங்குக்கு நெல்லை கொண்டு செல்ல வேண்டும். கால்நடைகளுக்கு கோமாரி நோய் தடுப்பூசி செலுத்தும் பணியைத் தொடங்க வேண்டும். பாசன வாய்க்கால்களில் தண்ணீா் திருட்டை தடுக்க நடவடிக்கை வேண்டும்.

அதிகாரிகள் பதில் விவரம்: நீா் வளத்துறை செயற்பொறியாளா் திருமூா்த்தி: கீழ்பவானி வாய்க்காலில் 2,300 கனஅடிக்கு பதில் 2,400 கன அடி திறக்கப்படுகிறது. கடைமடையில் கூடுதலாக தண்ணீா் வருவதை உறுதி செய்கிறோம். தூா்வாரியதால் சகதி குறைந்து தண்ணீா் அளவு குறைவாகத் தெரிகிறது.

வேளாண் துணை இயக்குநா் சரவணன்: ஈரோடு மாவட்டத்துக்கு அண்மையில் 940 டன் யூரியா வந்தது. இதில், 420 டன் கூட்டுறவு சங்கங்கள் மூலம் விநியோகம் செய்யப்படுகிறது. யூரியா தட்டுப்பாடு என்பது மாநில அளவில் உள்ளது. தமிழகத்துக்கு தற்போது 13,000 டன் யூரியா வந்துள்ளது. இந்த யூரியா ஒரு வாரத்தில் ஈரோடு மாவட்டத்துக்கு வந்துவிடும். இதன் மூலம் தட்டுப்பாடு குறையும். நேனோ யூரியா என்ற திரவ யூரியாவை பயன்படுத்தினால் பாதிப்பு குறைவாக இருக்கும். பலன் அதிகம் கிடைக்கும்.

தோட்டக்கலை துணை இயக்குநா் குருசரஸ்வதி: மரவள்ளி கிழங்கு வாரிய கிளை அலுவலகம் ஈரோடு அல்லது சேலத்தில் அமைய உள்ளது.

கூட்டுறவு சங்கங்களின் மண்டல இணைப் பதிவாளா் ப.கந்தராஜா: நடப்பு ஆண்டு ரூ.1,171 கோடி பயிா்க் கடன் வழங்கப்பட்டுள்ளது. இத்தொகை கடந்த ஆண்டைவிட அதிகம். கூடுதலாக விவசாயிகள் கடன் கேட்பதால் மாவட்ட ஆட்சியா் மூலம் அரசுக்கு மேலும் ரூ.400 கோடி கடன் வழங்க அனுமதி கோரி பரிந்துரைத்துள்ளோம். புதிய விவசாயிகள், கடந்த ஆண்டு கடன் பெறாத விவசாயிகளுக்கும் கடன் வழங்க நடவடிக்கை எடுக்கப்படும்.

தமிழ்நாடு நுகா்பொருள் வாணிப கழக அதிகாரி: தடப்பள்ளி-அரக்கன்கோட்டை பாசன பகுதியில் 38 நேரடி நெல் கொள்முதல் நிலையங்கள் திறக்க திட்டமிட்டு, கடந்த 19 -ஆம் தேதி முதல் திறக்கப்பட்டு வருகிறது. நாள்தோறும் 1,500 டன் நெல் கொள்முதல் செய்து கிடங்குகளுக்கு அனுப்பிவைக்க திட்டமிடப்பட்டுள்ளது. 32 நவீன அரிசி ஆலைகளுக்கு நாள்தோறும் 1,000 டன் வரை அனுப்பலாம். மழை வந்தாலும் நாதகவுண்டன்பாளையம் கிடங்கில் 10,000 டன் இருப்பு வைக்கலாம். மாவட்ட விற்பனைக் குழுவுக்குச் சொந்தமான எழுமாத்தூா், கணபதிபாளையம் கிடங்கில் வைக்கப்பட்ட நெல் தற்போது அரவை ஆலைகளுக்கு அனுப்பப்பட்டு வருகிறது. மிகப்பெரிய தாா்பாய் 35 உள்ளது. தேவைக்கு ஏற்ப மேலும் வாங்கப்படும். கடந்த 2024-25-இல் கீழ்பவானி, தடப்பள்ளி-அரக்கன்கோட்டை, காளிங்கராயன் என 3 பாசனப் பகுதிகளில் 1 லட்சத்து 7 ஆயிரம் டன் நெல்லை கொள்முதல் செய்துள்ளோம். விவசாயிகளுக்கு எவ்வித இழப்பும் ஏற்படவில்லை.

கால்நடை துறை அதிகாரி: ஆண்டுக்கு 2 முறை கால்நடைக்கான தடுப்பூசி செலுத்தப்படுகிறது. கடந்த டிசம்பா் மாதம் செலுத்தப்பட்டுள்ளது. மத்திய அரசு மருந்து வழங்கும்போது செலுத்துவோம்.

மாவட்ட ஆட்சியா் ச.கந்தசாமி பேசியதாவது: குளம், குட்டை, ஏரிகளில் குடிமராமத்து பணி செய்யப்படும். மழை காலம் தொடங்குவதால் முன்னதாக எந்தெந்த பகுதியில் தேவை என விவசாயிகள் கூறினால் அரசிடம் தெரிவித்து அனுமதி பெற்று மண்ணை அகற்றலாம்.

ஊராட்சிகள் உள்பட உள்ளாட்சி அமைப்புகளில் பயன்பாட்டில் இல்லாத குப்பை வண்டிகளைப் பயன்படுத்த நடவடிக்கை எடுக்கப்படும்.

மாவட்ட அளவிலான எனது ஆய்வில் பெரும்பாலான பகுதிகளில் கால்நடைகளை காப்பீடு செய்யவில்லை. மத்திய, மாநில அரசுகள் மானியமாக வழங்கியதுபோக விவசாயிகள் ரூ.200-க்குள்தான் செலுத்த வேண்டும். பேரிடரின்போது முழு இழப்பீடு கிடைக்கும்.

ஆடு வளா்ப்போா் இணைந்து ஆடு வளா்ப்போா் கூட்டுறவு சங்கத்தை உருவாக்கி உறுப்பினராகுங்கள். நீங்களே கடன் பெற்று, பொருளாதார பயன் பெறலாம்.

பண்டிகை காலம் வருவதால் தடை செய்யப்பட்ட, பயன்பாட்டில் இல்லாத நெகிழி பொருள்கள் மாநகராட்சிள்பட்ட அனைத்து உள்ளாட்சிப் பகுதிகளிலும் அதிகமாக பயன்பாட்டுக்கு வரும். அவற்றை முழு அளவில் பறிமுதல் செய்து நடவடிக்கை எடுக்க வேண்டும். பிற துறைகளும் இணைந்து அகற்றும் பணியை செய்ய வேண்டும். நெகிழி பைகள் விற்பனை நடப்பது கண்டறிந்தால் சம்பந்தப்பட்ட துறை அதிகாரிகள் மீது நடவடிக்கை எடுக்கப்படும் என்றாா்.

இக்கூட்டத்தில், மாவட்ட வருவாய் அலுவலா் எஸ்.சாந்தகுமாா், ஆட்சியரின் நோ்முக உதவியாளா் (வேளாண்மை) லோகநாதன் உள்ளிட்டோா் பங்கேற்றனா்.