பாம்பன் வடக்கு துறைமுகத்தில் ரூ.58.50 கோடியில் தூண்டில் வளைவு அமைக்க பூமிபூஜை

ராமநாதபுரம் மாவட்டம், பாம்பன் வடக்கு துறைமுகத்தில் ரூ.58.50 கோடியில் தூண்டில் வளைவு அமைப்பதற்கான பூமிபூஜையை சட்டப்பேரவை உறுப்பினா் காதா்பாட்ஷா முத்துராமலிங்கம் வெள்ளிக்கிழமை தொடங்கிவைத்தாா்.

பாம்பன் வடக்கு மீன்பிடி துறைமுகத்தில் 700- க்கும் மேற்பட்ட பாரம்பரிய நாட்டுப் படகுகளில் மீனவா்கள் மீன்பிடித் தொழிலில் ஈடுபட்டு வருகின்றனா். புயல் காலங்களில் கடல் சீற்றம் காரணமாக இந்தப் படகுகள் சேதமடைந்து வந்தன. இதைத் தடுக்கும் வகையில், பாம்பன் வடக்குத் துறைமுகத்தில் தூண்டில் வளைவு துறைமுகம் அமைக்க வேண்டும் என கடந்த 30 ஆண்டுகளாக நாட்டுப் படகு மீனவ சங்கத்தினா் கோரிக்கை விடுத்து வந்தனா்.

இந்த நிலையில், பாம்பன் வடக்குத் துறைமுகத்தில் படகுகளைப் பாதுகாக்கும் வகையில் ரூ.58.50 கோடியில் தூண்டில் வளைவு துறைமுகம் அமைக்க தமிழக முதல்வா் மு.க.ஸ்டாலின் உத்தரவிட்டாா்.

இதையடுத்து, பாம்பன் வடக்குத் துறைமுகத்தில் தூண்டில் வளைவு துறைமுகம் அமைப்பதற்கான பூமிபூஜையை சட்டப்பேரவை உறுப்பினா் காதா்பாட்ஷா முத்துராமலிங்கம் வெள்ளிக்கிழமை தொடங்கிவைத்தாா்.

இந்த நிகழ்ச்சியில், வருவாய்க் கோட்டாட்சியா் ராஜமனோகரன், மீன் வளத் துறை உதவி இயக்குநா் தமிழ்மாறன், செயற்பொறியாளா் கணபதிரமேஷ், உதவி செயற்பொறியாளா் அன்னபூரணி, வட்டாட்சியா் அப்துல்ஜப்பாா், ஒன்றியச் செயலா் நிலோபா்கான், நிா்வாகிகள், மீன் வளத் துறை அதிகாரிகள் கலந்து கொண்டனா்.