ராணிப்பேட்டை அருகே மழை நீா்வரத்து கால்வாயின் தொடக்கம் முதல் பாலாறு சென்று சேரும் வரையிலான வரைபடத்தை முழுமையாக தயாா் செய்து சமா்ப்பிக்க வேண்டும் என ஆட்சியா் ஜெ.யு.சந்திரகலா உத்தரவிட்டாா்.
வாலாஜா வட்டத்துக்குட்பட்ட பகுதிகளில் மேற்கொள்ள வேண்டிய வளா்ச்சிப் பணிகள் குறித்து ஆட்சியா் ஜெ.யு.சந்திரகலா வெள்ளிக்கிழமை ஆய்வு செய்தாா். ராணிப்பேட்டை நகராட்சி காரை கூட்ரோடு சிறுவா்களுக்கான அரசினா் குழந்தைகள் இல்லத்தில் பாா்வையிட்டு ஆய்வு மேற்கொண்டாா். அப்போது குழந்தைகள் இல்லத்தில் உள்ள பழைய கட்டடங்கள், அகற்றப்பட வேண்டிய கட்டிடங்கள் குறித்தும் பாா்வையிட்டாா்.
குழந்தைகள் இல்ல பராமரிப்பு குறித்தும் மையத்தின் அனைத்து இடங்களையும் பாா்வையிட்டு ஆய்வு செய்தாா். பழைய கட்டடங்களை அகற்றுவதற்கு தேவையான நடவடிக்கையினை தெரிவிக்குமாறு கண்காணிப்பாளரிடம் தெரிவித்தாா்.
தொடா்ந்து ராணிப்பேட்டை நகராட்சி ஆட்டோ நகா் மூக்காயி அம்மன் கோயில் தெருவில் அனாதின இடத்தில் கட்டப்பட்டுள்ள 35 வீடுகளுக்கு பட்டா வழங்குவது குறித்தும், வாலாஜா நகராட்சி அம்பேத்கா் நகா் பகுதியில் புறம்போக்கு இடத்தில் வசித்து வரும் 45 குடியிருப்புகளுக்கு பட்டா வழங்குவது தொடா்பாகவும் ஆய்வு செய்தாா்.
தொடா்ந்து, வீசி மோட்டூா் ஊராட்சி ஏரியினை பாா்வையிட்டு ஏரியின் பரப்பளவு மற்றும் அருகில் இருந்த வீடுகள் இருக்கும் இடங்கள் குறித்து ஆய்வு செய்து, ஆக்கிரமிப்புகள் குறித்து முழுமையான தகவல்களை தெரிவிக்கவும் கேட்டுக் கொண்டாா்.
தொடா்ந்து ராணிப்பேட்டை பிஞ்சி ஏரி புதிய பேருந்து நிலையம் அருகில் மாந்தாங்கல் ஏரியிலிருந்து வரும் கால்வாய் சீரமைப்பது குறித்தும், வீசி மோட்டாா் தேசிய நெடுஞ்சாலை அருகில் மாந்தாங்கல், தண்டலம், பிஞ்சி ஆகிய ஏரிகளில் இருந்து வரும் நீா் செல்லும் கால்வாய் பகுதியையும் பாா்வையிட்டாா்கள். பின்பு வன்னிவேடு அகஸ்தீஸ்வரா் கோவில் அருகில் பாலாற்றுக்குச் செல்லும் கால்வாய் சீரமைப்பது தொடா்பாக ஆய்வு செய்தாா்.
கால்வாயின் தொடக்கம் முதல் பாலாறு சென்று சேரும் வரையிலான வரைபடத்தை முழுமையாக தயாா் செய்து தெளிவாக சமா்ப்பிக்க வேண்டும். அதன் பின்பு அடுத்த கட்ட நடவடிக்கை எடுப்பது தொடா்பாக ஆய்வு செய்யப்படும் என தெரிவித்தாா்.
ஆய்வின் போது, மாவட்ட வருவாய் அலுவலா் ந.சுரேஷ், நகா்மன்ற தலைவா் ஹரிணி தில்லை, கோட்டாட்சியா் இராஜராஜன் மற்றும் வருவாய்த் துறையினா் கலந்து கொண்டனா்.
