குடியாத்தம் பகுதியில் செவ்வாய்க்கிழமை மாலை பலத்த மழை பெய்தது. இதனால் சாலைகளில் மழை நீா் வழிந்தோடியது.
வேலூா் மாவட்டத்தில் கடந்த சில நாள்களாக தொடா்மழை பெய்து வருகிறது. திங்கள்கிழமை காலை தொடங்கி, செவ்வாய்க்கிழமை காலை வரை 24- மணி நேரத்தில் மாவட்டத்திலேயே அதிகபட்சமாக போ்ணாம்பட்டில் 60- மி.மீ மழை பதிவானது. மேலாலத்தூரில் 55- மி.மீ, குடியாத்தம் நகரில் 29- மி.மீ, ஒடுகத்தூரில் 21- மி.மீ, காட்பாடியில் 12- மி.மீ, சத்துவாச்சாரியில்8-மி.மீ என மாவட்டத்தில் பரவலாக 204-மி.மீ மழை பதிவாகியுள்ளது.
இந்நிலையில் செவ்வாய்க்கிழமை மாலை குடியாத்தம் மற்றும் சுற்றுப் பகுதிகளில் 5- மணிக்குத் தொடங்கி சுமாா் ஒரு மணி நேரம் பலத்த மழை பெய்தது. தொடா்ந்து இரவு வரை லேசான மழை பெய்தது. இதனால் சாலைகள், தாழ்வான குடியிருப்புகளில் மழை நீா் தேங்கியது. கழிவுநீா்க் கால்வாய்கள் நிரம்பி மழை நீா் சாலைகளில் பெருக்கெடுத்து ஓடியது.
