அரசுப் பள்ளிகளில் மாணவா்களின் கற்றல் திறன்: ராணிப்பேட்டை ஆட்சியா் நேரில் ஆய்வு

ராணிப்பேட்டை மாவட்டம் ஆற்காடு மற்றும் நீலகண்ராயன்பேட்டை அரசுப் பள்ளிகளில் மாணவா்களின் கற்றல் திறன் குறித்து மாவட்ட ஆட்சியா் ஜெ.யு .சந்திரகலா வியாழக்கிழமை நேரில் பாா்வையிட்டு ஆய்வு செய்தாா்.

ராணிப்பேட்டை மாவட்ட ஆட்சியா் ஜெ.யு.சந்திரகலா ஆற்காடு தோப்புகானா நகராட்சி தெற்கு அரசு உயா்நிலைப் பள்ளியில் பாா்வையிட்டு ஆய்வு மேற்கொண்டாா். பின்னா் 10-ஆம் வகுப்பு கணித பாடம் நடைபெறும் வகுப்பறையில் மாணவா்களின் கற்றல் திறன் குறித்து ஆய்வு செய்து, ஆசிரியா்களிடம் மாணவா்களுக்கு கற்பிக்கும்போது கற்பித்த பாடம் புரிந்துள்ளதா என்பதை உறுதிப்படுத்திட வேண்டும்.

மாணவா்கள் புரிந்துகொள்ளும் வகையில், சிறப்பான வகையில் பயிற்றுவிக்க வேண்டும் என அறிவுரை வழங்கினாா். தொடா்ந்து பள்ளியில் கழிப்பறை வசதி பிரச்னை இருப்பதை

ஆய்வு செய்து புதிய கழிப்பறை கட்டுவதற்கு நடவடிக்கைகள் குறித்து கேட்டறிந்தாா். கழிப்பறை வசதியை கட்டாயம் மேம்படுத்திட நடவடிக்கை எடுக்க வேண்டும் என நகராட்சி ஆணையருக்கு உத்தரவிட்டாா். தொடா்ந்து தோப்புகானா வடக்கு உயா்நிலைப் பள்ளியில் மாணவா்களின் ஆங்கிலம் கற்றல் திறமையை ஆய்வு செய்தாா்.

பின்னா், சோளிங்கா் ஒன்றியம், நீலகண்ட ராயப்பேட்டை அரசு மேல்நிலைப் பள்ளியில் கற்றல் திறமையை ஆய்வு செய்தாா்.

மாணவா்கள் கவனம் சிதறாமல் படிக்க வேண்டும். ஒழுக்கமாக இருக்க வேண்டும் என அறிவுரை வழங்கினாா்.

இந்த ஆய்வுகளில் மாவட்ட முதன்மைக் கல்வி அலுவலா் பிரேமலதா (பொறுப்பு), மாவட்டக் கல்வி அலுவலா் (இடைநிலை) தி.கிளாடி சுகுணா, ஆற்காடு நகராட்சி ஆணையா் வேங்கடலட்சுமணன், வட்டாட்சியா்கள் பள்ளித் தலைமையாசிரியா்கள் உடனிருந்தனா்.