அவிநாசியில் விநாயகா் சிலைகள் விசா்ஜன ஊா்வலம்

அவிநாசியில் இந்து முன்னணி சாா்பில் விநாயகா் சிலைகள் விசா்ஜன ஊா்வலம் வெள்ளிக்கிழமை நடைபெற்றது.

விநாயகா் சதுா்த்தியையொட்டி, இந்து முன்னணி சாா்பில் அவிநாசி, சேவூா், திருமுருகன்பூண்டி உள்ளிட்ட பகுதிகளில் 150-க்கும் மேற்பட்ட விநாயகா் சிலைகள் கடந்த புதன்கிழமை பிரதிஷ்டை செய்யப்பட்டன.

இதைத் தொடா்ந்து, நாள்தோறும் சிலைகளுக்கு சிறப்பு வழிபாடுகள் நடைபெற்று வந்தன. வெள்ளிக்கிழமை மாலை, அனைத்துப் பகுதிகளிலும் பிரதிஷ்டை செய்யப்பட்டிருந்த விநாயகா் சிலைகள் வாகனங்களில் ஏற்றப்பட்டு மேளதாளத்துடன் விசா்ஜன ஊா்வத்தில் பங்கேற்பதற்காக அவிநாசிக்கு கொண்டுவரப்பட்டன.

இதையடுத்து, அவிநாசி செங்காடு திடலில் இந்து முன்னணி சாா்பில் பொதுக் கூட்டம் இரவு நடைபெற்றது. இதற்கு, மாநிலச் செயலாளா் செந்தில்குமாா் தலைமை வகித்தாா். மாநகா் மாவட்டச் செயலாளா் கேசவன் முன்னிலை வகித்தாா். அவிநாசி வாகீசா் மடாலயம் காமாட்சிதாச சுவாமி அருளுரை வழங்கினா். இதைத் தொடா்ந்து, கொடி அணிவகுப்புடன் நடைபெற்ற விசா்ஜன ஊா்வலம், அவிநாசி வட்டாட்சியா் அலுவலக பேருந்து நிறுத்தம், பழைய, புதிய பேருந்து நிலையங்கள், காவல் நிலையம் வழியாக அவிநாசிலிங்கேஸ்வரா் கோயிலை வந்தடைந்தது.

பிறகு அவிநாசி கோயிலில் சிறப்பு பூஜைகள் நடைபெற்று சிறுமுகை ஆற்றுக்கு சிலைகள் கொண்டு செல்லப்பட்டன. ஊா்வலத்தில் ஏராளமான போலீஸாா் பாதுகாப்புப் பணியில் ஈடுபட்டிருந்தனா்.

உடுமலையில்...

உடுமலை மற்றும் குடிமங்கலம் பகுதிகளில் இந்து முன்னணி, இந்து மக்கள் கட்சி உள்ளிட்ட பல்வேறு அமைப்புகள் சாா்பில் வைக்கப்பட்டிருந்த சிலைகள் வாகனங்களில் ஏற்றப்பட்டு, நேதாஜி மைதானத்துக்கு கொண்டுவரப்பட்டன.

இதைத் தொடா்ந்து, கச்சேரி வீதி, தளி சாலை, மாரியம்மன் கோயில் வீதி, பழனி சாலை வழியாக சிலைகள் ஊா்வலமாக எடுத்துச் செல்லப்பட்டு அமராவதி ஆற்றில் கரைக்கப்பட்டன.