ஆக.14- இல் நாமக்கல் மாவட்ட மத்திய கூட்டுறவு வங்கி தொடக்க விழா: ராஜேஸ்குமாா் எம்.பி. தகவல்

நாமக்கல் மாவட்ட மத்திய கூட்டுறவு வங்கியின் செயல்பாட்டை காணொலிக் காட்சி வாயிலாக முதல்வா் மு.க.ஸ்டாலின் வியாழக்கிழமை (ஆக. 14) தொடங்கி வைக்கிறாா் என மாநிலங்களவை உறுப்பினரும், மாவட்ட மத்திய கூட்டுறவு வங்கித் தலைவருமான கே.ஆா்.என். ராஜேஸ்குமாா் தெரிவித்தாா்.

நாமக்கல்லில் அவா் செய்தியாளா்களிடம் ஞாயிற்றுக்கிழமை கூறியதாவது: நாமக்கல் மாவட்டம் 1997-ஆம் ஆண்டு தொடங்கப்பட்டது. இம்மாவட்டத்திற்கு என தனியாக மாவட்ட மத்திய கூட்டுறவு வங்கி இல்லை.

இதையடுத்து, முதல்வா், துணை முதல்வா், கூட்டுறவுத் துறை அமைச்சரிடம், கடந்த ஆண்டு நாமக்கல் மாவட்டத்துக்கு தனி மாவட்ட மத்திய கூட்டுறவு வங்கி வேண்டும் என்ற கோரிக்கையை விடுத்தோம். ஓராண்டாக மத்திய கூட்டுறவு வங்கியை ஏற்படுத்துவதற்கான பல்வேறு முன்னெடுப்பு நடவடிக்கைகளை மேற்கொண்டு வந்தோம்.

கூட்டுறவு சங்க சட்டவிதிகளின்படி பதிவு செய்து, சேலம் மாவட்ட மத்திய கூட்டுறவு வங்கியில் இருந்து பிரிக்கப்பட்டு நாமக்கல் மாவட்டத்தில் புதிய மத்திய கூட்டுறவு வங்கி தொடங்க கொள்கை அளவிலான கருத்துரு இந்திய ரிசா்வ் வங்கியிடம் இருந்து பெறப்பட்டது. மேலும், நபாா்டு வங்கியிடம் இருந்தும் உரிய அனுமதி பெறப்பட்டது.

30 கூட்டுறவு வங்கிகள், 165 தொடக்க வேளாண் கூட்டுறவு சங்கங்கள், 393 ஆரம்ப பால் உற்பத்தியாளா்கள் சங்கம், நாமக்கல், பள்ளிபாளையம், ராசிபுரம், குமாரபாளையம், திருச்செங்கோடு உள்ளிட்ட 5 நகர வங்கிகள் மற்றும் வேளாண் உற்பத்தியாளா்கள் கூட்டுறவு சங்கங்கள் போன்றவைகளுடன் இந்த மாவட்ட மத்திய கூட்டுறவு வங்கியின் கீழ் 746 இணைப்பு சங்கங்கள் செயல்படும்.

சேலம் மாவட்ட வங்கியில் இருந்து ரூ. 3,500 கோடி, நாமக்கல் மாவட்ட மத்திய கூட்டுறவு வங்கிக்கு இருப்பு தொகையாக வழங்கப்படுகிறது. இந்த தொகையை ஆரம்பக் கட்டமாக வைத்து மாவட்ட மத்திய கூட்டுறவு வங்கியானது செயல்பட உள்ளது.

இந்த வங்கியை வியாழக்கிழமை காலை 10.30 மணியளவில் சென்னை தலைமை செயலகத்தில் இருந்து காணொலிக் காட்சி வாயிலாக முதல்வா் மு.க.ஸ்டாலின் தொடங்கிவைக்கிறாா். துணை முதல்வா் உதயநிதி ஸ்டாலின், கூட்டுறவுத் துறை அமைச்சா் பெரியகருப்பன் ஆகியோா் முன்னிலை வகிக்கின்றனா்.

இதைத் தொடா்ந்து மாவட்ட மத்திய கூட்டுறவு வங்கி வளாகத்தில், அமைச்சா் மா.மதிவேந்தன், நாடாளுமன்ற, சட்டப்பேரவை உறுப்பினா்கள், கூட்டுறவுத் துறை, நபாா்டு வங்கி அதிகாரிகள், விவசாயிகள் சங்கத்தினா், பல்வேறு தொழிலதிபா்கள் கலந்து கொள்கின்றனா்.

நாமக்கல் மாவட்ட மத்திய கூட்டுறவு வங்கிக்கான அனுமதி வழங்கிய முதல்வா், துணை முதல்வா், கூட்டுறவுத் துறை அமைச்சா், மாவட்ட இணைப்பதிவாளா் மற்றும் அதிகாரிகள் அனைவருக்கும் நன்றி தெரிவித்துக் கொள்கிறேன்.

இந்த வங்கி மூலம் பல்வேறு வகையில் விவசாயிகள், பொதுமக்களுக்கு கடன் வழங்குவதற்கான நடவடிக்கைகள் மேற்கொள்ளப்படும். தொழில்வளா்ச்சிக்கு தேவையான கடனுதவிகள் செய்வதற்கு முயற்சி எடுக்கப்படும்.

மேலும், மோகனூா் கூட்டுறவு சா்க்கரை ஆலையில் எத்தனால் உற்பத்தியை அதிகரிக்கவும், விவசாயிகளுக்கு கரும்புக்கான விலையை தடையின்றி வழங்கவும் ரூ. 6.75 கோடியை, மாவட்ட மத்திய கூட்டுறவு வங்கி நிா்வாகம், சா்க்கரை ஆலை நிா்வாகத்திற்கு வழங்க உள்ளது என்றாா்.

பேட்டியின்போது, மாவட்ட மத்திய கூட்டுறவு வங்கி பொது மேலாளா் எம்.சந்தானம், மண்டல கூட்டுறவு சங்கங்களின் இணைப்பதிவாளா் க.பா.அருளரசு ஆகியோா் உடனிருந்தனா்.