தமிழகத்தில் கடந்த நான்கரை ஆண்டுகளில் 1,038 திருக்கோயில்களுக்குச் சொந்தமான ரூ.8,015.80 கோடி மதிப்பீட்டிலான 7,930.34 ஏக்கா் நிலங்கள் ஆக்கிரமிப்பிலிருந்து மீட்கப்பட்டுள்ளதாக இந்து சமய அறநிலையத் துறை தெரிவித்துள்ளது.
இதுகுறித்து வெளியிடப்பட்ட செய்திக் குறிப்பு:
இந்து சமய அறநிலையத் துறையின் கட்டுப்பாட்டில் உள்ள திருக்கோயில்களுக்குச் சொந்தமான சொத்துகள் ஆக்கிரமிப்பாளா்களிடமிருந்து மீட்கும் பணிகள் துரிதமாக நடைபெற்று வருகின்றன. மேலும், இந்து சமய அறநிலையத் துறை ஆணையா் அலுவலகத்தில் மாதந்தோறும் நடைபெறும் சீராய்வுக் கூட்டங்களின்போது, துறை சாா்ந்த திட்டங்கள் மற்றும் சட்டப்பேரவை அறிவிப்புகளின் பணி முன்னேற்றத்தை துறையின் அமைச்சா் பி.கே.சேகா்பாபு ஆய்வு செய்யும்போது, திருக்கோயில் சொத்துகளை ஆக்கிரமிப்பில் இருந்து மீட்கும் பணிகளுக்கு தனி முக்கியத்துவம் அளித்து தொடா் நடவடிக்கை மேற்கொள்ள அறிவுறுத்தி வருகிறாா்.
2021 மே முதல் இதுவரை 1,038 திருக்கோயில்களுக்குச் சொந்தமான ரூ. 8,015.80 கோடி மதிப்பிலான 7,930.34 ஏக்கா் நிலங்கள் ஆக்கிரமிப்பிலிருந்து மீட்கப்பட்டுள்ளதோடு, நவீன தொழில்நுட்பக் கருவிகளின் உதவியோடு திருக்கோயில்களுக்கு சொந்தமான 2,15,385 ஏக்கா் நிலங்கள் அளவீடு செய்யப்பட்டு 1, 41,820 எல்லை கற்கள் நட்டு பாதுகாக்கப்பட்டுள்ளன.
இந்த நிலையில், சென்னை அரும்பாக்கம் உத்தனாச்சியம்மன், மங்களேஸ்வரா் மற்றும் பால விநாயகா் திருக்கோயிலுக்குச் சொந்தமான கோயம்பேடு ஜவாஹா்லால் நேரு சாலையில் அமைந்துள்ள ரூ. 13 கோடி மதிப்பிலான 8,742 சதுர அடி வணிக மனை மற்றும் கட்டடம் ஆக்கிரமிப்பிலிருந்து அண்மையில் மீட்கப்பட்டது. இதை அமைச்சா் பி.கே.சேகா்பாபு வியாழக்கிழமை நேரில் பாா்வையிட்டு ஆய்வு செய்தாா் எனத் தெரிவிக்கப்பட்டுள்ளது.
