ஆற்றில் மூழ்கி உயிரிழந்த இளைஞரின் குடும்பத்தினருக்கு நிதியுதவி

மயிலாடுதுறையில், ஆற்றில் மூழ்கி உயிரிழந்த இளைஞரின் குடும்பத்தினருக்கு தமிழக அரசின் நிதியுதவியை எம்எல்ஏ எஸ். ராஜகுமாா் செவ்வாய்க்கிழமை வழங்கினாா்.

மயிலாடுதுறை பட்டமங்கல ஆராயத் தெருவைச் சோ்ந்த அருண்சங்கா் (22), சீா்காழி கொண்டல் குடியானத் தெருவைச் சோ்ந்த சிபிராஜ் (21) ஆகிய இருவரும், சீா்காழி அகரஎலத்தூா் பனங்காட்டங்குடி பகுதி கொள்ளிடம் ஆற்றில் ஞாயிற்றுக்கிழமை குளித்துக் கொண்டிருந்தனா்.

அப்போது, இருவரும் எதிா்பாராதவிதமாக நீரில் மூழ்கி உயிரிழந்தனா். இவா்களது குடும்பத்தினருக்கு தலா ரூ.3 லட்சம் முதலமைச்சரின் பொது நிவாரண நிதியிலிருந்து வழங்கப்படும் என முதல்வா் மு.க. ஸ்டாலின் அறிவித்திருந்தாா்.

இதில், அருண்சங்கரின் பெற்றோரிடம் ரூ. 3 லட்சத்திற்கான காசோலையை மயிலாடுதுறை எம்எல்ஏ எஸ். ராஜகுமாா், வழங்கி, அவா்களுக்கு ஆறுதல் கூறினாா். நகா்மன்றத் தலைவா் என். செல்வராஜ், வட்டாட்சியா் சுகுமாறன், தனி வட்டாட்சியா் து. விஜயராகவன் உள்ளிட்டோா் உடன் இருந்தனா்.