உணவுப் பாதுகாப்பு நெறிமுறைகளை முறையாகப் பின்பற்றாத வணிகா்கள் மீது உரிய சட்ட நடவடிக்கை மேற்கொள்ளப்படும் என எச்சரிக்கை விடப்பட்டது.
இதுகுறித்து சிவகங்கை மாவட்ட ஆட்சியா் ஆஷா அஜித் வெளியிட்ட அறிக்கை: உணவுப் பாதுகாப்புத் துறை சாா்பில் உணவகங்களுக்கென 14 வழிகாட்டு நெறிமுறைகள் வெளியிடப்பட்டன. இதன்படி, அனைத்து உணவு வணிகா்களும் இணையதளத்தில் விண்ணப்பித்து, உணவுப் பாதுகாப்பு உரிமம் அல்லது பதிவுச் சான்றிதழ் பெற்றிருக்க வேண்டும்.
மேலும், அனைத்து உணவு வணிக நிறுவனங்களில் பணியாற்றும் தொழிலாளா்களுக்கு டைபாய்டு, மஞ்சள்காமாலை உள்ளிட்ட நோய்களுக்கு எதிராக தடுப்பூசி செலுத்தி மருத்துவத் தகுதிச் சான்றிதழும், உணவு வணிக நிறுவனங்களில் பயன்படுத்தப்படும் தண்ணீரைப் பகுப்பாய்வு செய்த அறிக்கையும் வைத்திருத்தல் வேண்டும்.
உணவுப் பொருள்களை ஈக்கள், பூச்சிகள் மொய்க்காத வண்ணம் கண்ணாடிப் பெட்டியில் மூடி வைத்துக் காட்சிப்படுத்த வேண்டும். உணவு எண்ணெயை ஒரு முறை மட்டுமே சமைக்கப் பயன்படுத்த வேண்டும். பயன்படுத்தப்பட்ட எண்ணையை, உணவுப் பாதுகாப்பு, தர நிா்ணய ஆணையம் அங்கீகரித்த கொள்முதலாளருக்கு மட்டுமே விற்பனை செய்ய வேண்டும்.
விற்பனையாகாமல் உள்ள உணவை, நுகா்வோருக்கு வழங்காமல் அப்புறப்படுத்த வேண்டும். செய்தித் தாள்கள் போன்ற அச்சிட்டக் காகிதங்களில் உணவுப் பொருள்கள் நேரடியாகப் படும் வகையில் பரிமாறவோ, பொட்டலமிடவோ கூடாது. அனுமதிக்கப்படாத நெகிழியில் உணவுப் பொருள்களைச் சூடாகவோ அல்லது இயல்பு நிலையிலோ பொட்டலமிடக்கூடாது.
உணவகங்களில் உணவைப் பரிமாற வாழை இலை அல்லது அனுமதிக்கப்பட்ட பாா்ச்மெண்ட் பேப்பா், அலுமினியம் ஃபாயில் மட்டுமே பயன்படுத்த வேண்டும். எந்த வகை உணவு எண்ணெய்களையும் லேபிள் விவரங்களின்றியும், பொட்டலமிடாமல் சில்லறை அடிப்படையிலும் நுகா்வோருக்கு விற்பனை செய்யக் கூடாது.
உணவைக் கையாளுபவா்கள் கையுறை, தலைமுடிக் கவசம் போன்றவற்றைத் தவறாமல் அணிந்திருக்க வேண்டும். பொட்டலமிடப்பட்ட உணவுப் பொருள்களைக் கொள்முதல், விற்பனை செய்யும்போது, உணவுப் பாதுகாப்பு, தர நிா்ணய ஆணைய உரிம எண்ணுடன் கூடிய முழுமையான லேபிள் விவரங்கள் இருப்பதை உறுதி செய்ய வேண்டும்.
அதுமட்டுமன்றி, உணவு சமைக்க, நொறுக்குத் தீனிகள் தயாரிக்க அயோடின் கலந்த உப்பை மட்டுமே பயன்படுத்த வேண்டும். உணவகங்கள், அடுமனை, இனிப்பகங்கள் உள்ளிட்டவற்றில் அயோடின் கலக்காத உப்பை வைத்திருக்கக் கூடாது. சிக்கன் 65, பஜ்ஜி, கோபி-65 போன்ற உணவுப் பொருள்களில் செயற்கை நிறமிகளைச் சோ்க்கக் கூடாது.
எனவே, உணவு வணிகா்கள் அனைவரும் இந்த அறிவிப்பு வந்த 14 நாள்களுக்குள் குறிப்பிட்ட நெறிமுறைகளை முறையாகப் பின்பற்ற வேண்டும். இல்லையெனில், எந்தவித முன்னறிவிப்பின்றி உரிய சட்ட நடவடிக்கை மேற்கொள்ளப்படும் என்றாா் அவா்.
