ஐஸ் நிறுவன உரிமையாளருக்கு கத்திக்குத்து: ஊழியா் கைது

கோவையில் குல்பி ஐஸ் நிறுவன உரிமையாளரைக் கத்தியால் குத்திய ஊழியரை போலீஸாா் கைது செய்தனா்.

கோவை, ராமநாதபுரம் அருகேயுள்ள சுங்கம், இந்திரா நகரைச் சோ்ந்தவா் சாம்சன் கிஷோா் (27). இவா் அந்தப் பகுதியில் குல்பி ஐஸ் தயாரிக்கும் நிறுவனம் நடத்தி வருகிறாா். இவரது நிறுவனத்தில், மதுரை தெற்குவாசல் பகுதியைச் சோ்ந்த விஷால்குமாா் (20) என்பவா் தங்கி, குல்பி ஐஸை பெட்டியில் கொண்டு சென்று விற்பனை செய்யும் பணியில் ஈடுபட்டு வருகிறாா்.

இந்நிலையில், ஐஸ் விற்ற பணத்தை உரிமையாளா் சாம்சன் கிஷோரிடம், விஷால்குமாா் கடந்த 10 நாள்களாக கொடுக்கவில்லையாம். இது தொடா்பாக இருவருக்கும் இடையே அண்மையில் வாக்குவாதம் ஏற்பட்டுள்ளது.

இந்நிலையில், தனது வீட்டின் முன் சனிக்கிழமை நின்று கொண்டிருந்த சாம்சன் கிஷோரிடம், விஷால்குமாா் தகராறில் ஈடுபட்டு, அவரைக் கத்தியால் குத்தியுள்ளாா். பலத்த காயமடைந்த சாம்சன் கிஷோா் கோவை அரசு மருத்துவமனையில் சிகிச்சை பெற்று வருகிறாா்.

புகாரின்பேரில், ராமநாதபுரம் போலீஸாா் வழக்குப் பதிவு செய்து விஷால்குமாரை கைது செய்தனா்.