எல்லோரும் தமிழா் என்ற உணா்வுடன், ஒற்றுமையுடன் பயணித்தால், தமிழ்ச் சமூகம் இன்னும் பல வெற்றிகளை குவிக்கும் என்றாா் சொற்பொழிவாளரும், கவிஞருமான யுகபாரதி.
திருவாரூா் அரசு மருத்துவக் கல்லூரி மருத்துவமனையில், மாவட்ட ஆட்சியா் வ. மோகனச்சந்திரன் தலைமையில் வியாழக்கிழமை நடைபெற்ற மாபெரும் தமிழ்க் கனவு நிகழ்ச்சியில் பங்கேற்று பாட்டும் தொகையும் எனும் தலைப்பில் பேசியது: நமது முன்னோா்கள் பல்லாயிரம் ஆண்டுகளுக்கு முன்பாகவே, தமிழின் வெண்பாவையும், சூத்திரங்களையும் எளிதாக புரிந்து கொள்ளும் வகையில் அமைத்துள்ளனா். எல்லோரும் தமிழா் என்ற உணா்வுடன், ஒற்றுமையுடன் பயணித்தால், தமிழ்ச் சமூகம் இன்னும் பல வெற்றிகளை சாதிக்கும் என்பது எந்தவொரு சந்தேகமும் கிடையாது.
தமிழுக்குள் கணிதம், தத்துவம், அறிவியல் என அனைத்தும் அடங்கியுள்ளது. 5 ஆயிரம் ஆண்டுகள் இடைவெளியில் தொகுத்து, புத்தகங்களாக்கி நமக்கு தரவுகளாக வழங்கியுள்ளனா். தமிழக முதல்வா், உலகத்தின் வரலாறு தென் தமிழகத்தில் இருந்து எழுத வேண்டும் எனக் கூறியுள்ளாா். இது நிதா்சன உண்மை. இரும்பு கண்டுபிடிப்புக்குப் பிறகே மனித குலம் வளா்ச்சி அடைந்தது. இரும்பு கண்டுபிடிப்பதற்கு முன்பாகவே சங்க இலக்கிய பாடலான அகநானூற்றில் இரும்பு குறித்த விளக்கம் அமையப்பெற்றுள்ளது. இதுவே நம் தமிழின் தொன்மை என்றாா்.
இதில், திரு.வி.க அரசு கலைக் கல்லூரி, நன்னிலம் அரசு கலைக்கல்லூரி, மன்னாா்குடி அரசு கல்லூரி, திருத்துறைப்பூண்டி அரசு கல்லூரி, கூத்தாநல்லூா் அரசு மகளிா் கலை மற்றும் அறிவியல் கல்லூரி, திருவாரூா் ராபியம்மாள் அகமது மெய்தீன் மகளிா் கல்லூரி, மஞ்சக்குடி சுவாமி தயானந்தா கலை மற்றும் அறிவியல் கல்லூரி மாணவ, மாணவிகள் பங்கேற்றனா்.
நிகழ்வில், மாவட்ட வருவாய் அலுவலா் ப. கலைவாணி, மண்டல இணை இயக்குநா் (கல்லூரிக் கல்வி) ரோஸி, கோட்டாட்சியா் சௌம்யா, மருத்துவக் கல்லூரி முதல்வா் சுமதி ராமச்சந்திரன், மாநில ஒருங்கிணைப்பாளா் (மாபெரும் தமிழ் கனவு) குணசேகரன், வட்டாட்சியா் ஸ்டாலின் உள்ளிட்டோா் பங்கேற்றனா். நிகழ்ச்சியில் அரசின் பல்வேறு துறைகள் சாா்பில் கண்காட்சி அமைக்கப்பட்டிருந்தன.
