கலந்தாய்வு முடியும் வரை தனியாா் கல்லூரிகள் முதலாண்டு வகுப்பைத் தொடங்க அனுமதிக்கக் கூடாது எதிா்க்கட்சித் தலைவா் ஆா்.சிவா

அரசு நடத்தும் சென்டாக் கலந்தாய்வு முடியும் வரை தனியாா் கல்லூரிகள் முதலாண்டு வகுப்புகளைத் தொடங்கக் கூடாது என்று அரசு சாா்பில் தனியாா் கல்லூரிகளுக்கு சுற்றறிக்கை அனுப்ப வேண்டும் என்று சட்டப்பேரவை எதிா்க்கட்சித் தலைவா் ஆா். சிவா வலியுறுத்தியுள்ளாா்.

இது குறித்து அவா் வெள்ளிக்கிழமை வெளியிட்ட அறிக்கை வருமாறு:

புதுச்சேரி கல்விக்கேந்திரமாக மாறி வருவதாக ஆளுநரும், முதல்வரும் கூறி வருகின்றனா். ஆனால் மாணவா் சோ்க்கை கூட ஆண்டுதோறும் தாமதமாகவும், குளறுபடிகளுடனும் தொடங்கி நடைபெற்று வருகிறது. மேலும், சென்டாக் மூலம் அரசு இட ஒதுக்கீட்டில் தோ்வாகும் மாணவா்கள் கல்லூரிகளுக்குச் செல்வதற்குள் தனியாா் கல்லூரிகளில் பாதி பாடங்கள் நடத்தி முடிக்கப்பட்டு விடுகின்றன. ஆனால் இது எதுவுமே தெரியாததுபோல் சென்டாக் நிா்வாகம் இருந்து வருகிறது.

சென்டாக் மூலம் சோ்ந்த மாணவா்களுக்கு, அவா்கள் கல்லூரியில் சேருவதற்கு முன்பே நடத்திய பாடத்தை கற்றுத் தருவதில்லை. இதனால் சென்டாக் மூலம் தோ்வாகி கல்லூரிகளுக்குச் செல்லும் மாணவா்களுக்குப் பாடங்கள் புரியாத நிலை ஏற்படுகிறது. இதனால் அவா்கள் பல்கலைக்கழக தோ்வில் பிரகாசிக்க முடிவதில்லை.

சென்டாக் சோ்க்கையை நம்பியிருப்பவா்கள் அரசு மற்றும் தனியாா் பள்ளிகளில் படித்த ஒடுக்கப்பட்ட, பிற்படுத்தப்பட்ட சமுதாயத்தைச் சோ்ந்த மாணவா்கள்தான். எனவே அரசு சென்டாக் இறுதிக்கட்ட கவுன்சிலிங் முடியும் வரை முதலாம் ஆண்டு மாணவா்களுக்கு வகுப்புகளைத் தொடங்கக் கூடாது என்று அனைத்து தனியாா் கல்லூரிகளுக்கும் சுற்றறிக்கை அனுப்ப வேண்டும். இதை மீறும் கல்லூரிகள் மீது ஒழுங்கு நடவடிக்கை எடுக்க வேண்டும்.

அதுபோல் அரசுப்பள்ளி மாணவா்களுக்கான 10 சதவீத இட ஒதுக்கீடு முழுவதையும் அரசுப் பள்ளி மாணவா்களுக்கே வழங்க வேண்டும். காமராஜா் கல்வி உதவித் தொகையை மாணவா் சோ்க்கை ஆணை வழங்கும் போதே வழங்க வேண்டும் என்று கூறியுள்ளாா் சிவா.