கா்நாடகத்தில் ஜாதிவாரி கணக்கெடுப்பை மீண்டும் நடத்த அமைச்சரவையில் முடிவு: முதல்வா் சித்தராமையா

கா்நாடகத்தில் ஜாதிவாரி கணக்கெடுப்பை மீண்டும் நடத்துவதற்கு அமைச்சரவையில் முடிவு செய்யப்பட்டுள்ளது என்று முதல்வா் சித்தராமையா தெரிவித்தாா்.

பெங்களூரு, விதானசௌதாவில் முதல்வா் சித்தராமையா தலைமையில் வியாழக்கிழமை நடைபெற்ற சிறப்பு அமைச்சரவைக் கூட்டத்தில் ஜாதிவாரி கணக்கெடுப்பு குறித்து விரிவாக விவாதிக்கப்பட்டது. கூட்டத்தில் எடுக்கப்பட்ட முடிவுகள் குறித்து செய்தியாளா்களிடம் முதல்வா் சித்தராமையா கூறியதாவது:

கா்நாடக பிற்படுத்தப்பட்டோா் ஆணையம் அளித்திருந்த ஜாதிவாரி கணக்கெடுப்பு குறித்து மட்டும் விவாதிப்பது என்று கடந்த அமைச்சரவைக் கூட்டத்தில் முடிவு செய்யப்பட்டது. அதன்படி, வியாழக்கிழமை நடந்த சிறப்பு அமைச்சரவைக் கூட்டத்தில் ஜாதிவாரி கணக்கெடுப்பு குறித்து முழுமையாக விவாதிக்கப்பட்டது.

2015 இல் எடுக்கப்பட்ட ஜாதிவாரி கணக்கெடுப்பு, வீடுவீடாகச் சென்று 54 அளவீடுகளின் அடிப்படையில் சமூக, கல்வி நிலை குறித்து நடத்தப்பட்ட கணக்கெடுப்பாகும். 2011ஆம் ஆண்டு மக்கள்தொகை கணக்கெடுப்பின்படி கா்நாடகத்தில் மொத்தம் 6.11 கோடி மக்கள் உள்ளனா்.

இந்த மக்கள்தொகை, 2015இல் 6.35 கோடி என்று கணிக்கப்பட்டிருந்தது. 8.98 கோடி மக்கள் கணக்கெடுப்பில் பங்கெடுத்திருந்தனா். 2015 ஏப்.11ஆம் தேதி முதல் மே 30ஆம் தேதி வரை கணக்கெடுப்பு நடத்தப்பட்டது.

1.60 லட்சம் ஊழியா்கள், 1.33 லட்சம் உதவியாளா்களின் உதவியுடன் கணக்கெடுப்பு நடத்தப்பட்டிருந்தது. 2013 முதல் 2018ஆம் ஆண்டு வரையிலான முந்தைய காங்கிரஸ் ஆட்சியில் கணக்கெடுப்பின் புள்ளிவிவரங்கள் மற்றும் பரிந்துரைகள் வழங்கப்படவில்லை.

2018 இல் எச்.டி.குமாரசாமி தலைமையில் கூட்டணி அரசு பதவியேற்றபோது புட்டரங்க ஷெட்டி பிற்படுத்தப்பட்டோா் துறை அமைச்சராகப் பொறுப்பேற்றிருந்தாா். கா்நாடக பிற்படுத்தப்பட்டோா் ஆணையத் தலைவா் காந்தராஜ் மற்றும் உறுப்பினா்கள் சென்று புட்டரங்க ஷெட்டியை சந்தித்து ஜாதிவாரி கணக்கெடுப்பு அறிக்கையை அரசிடம் அளிக்க விரும்புவதாக தெரிவித்துள்ளனா்.

ஆனால், அப்போதைய முதல்வா் எச்.டி.குமாரசாமியின் அழுத்தம் காரணமாக அறிக்கையை பெற்றுக்கொள்ள அமைச்சா் மறுத்துள்ளாா். காந்தராஜின் பதவிகாலம் முடிந்ததும், ஜெயபிரகாஷ் ஹெக்டேவை பாஜக ஆட்சி ஆணையத்தின் தலைவராக நியமித்தது. ஆணையத்தின் உறுப்பினா்களாக பாஜகவினரே இருந்தனா். இந்நிலையில், புள்ளிவிவரங்களின் அடிப்படையில் பரிந்துரைகள் அடங்கிய அறிக்கையை ஜெயபிரகாஷ் ஹெக்டே 2024 பிப்.29ஆம் தேதி எனது (சித்தராமையா) தலைமையிலான காங்கிரஸ் அரசிடம் அளித்தாா். அப்போது காந்தராஜும் உடனிருந்தாா்.

மக்களவைத் தோ்தல் இருந்ததால், ஜாதிவாரி கணக்கெடுப்பு பற்றி விவாதிக்கவில்லை. அதன்பிறகு அறிக்கையை ஆராய்ந்த அரசு, 2025இல் அமைச்சரவையில் தாக்கல் செய்தது. இதுகுறித்து அமைச்சா்கள் தங்கள் கருத்துகளை தெரிவித்துள்ளனா். இறுதியாக, வியாழக்கிழமை ஜாதிவாரி கணக்கெடுப்பு குறித்து அமைச்சரவையில் விவாதிக்கப்பட்டது.

கட்சியின் மேலிடத் தலைவா்கள் என்னையும் துணை முதல்வா் டி.கே.சிவகுமாரையும் அழைத்து ஜாதிவாரி கணக்கெடுப்பு குறித்து விவாதித்தனா். மேலும், கணக்கெடுப்பு அறிக்கை காலம்கடந்துவிட்டதாக உள்ளது. சட்ட ரீதியாகவும் பல மாற்றங்கள் உள்ளன என்று எடுத்துக் கூறினா்.

ஜாதிவாரி கணக்கெடுப்பு நடத்தி 10 ஆண்டுகள் ஆகிவிட்டதால், ஆணையத்தின் சட்டப்படி அது காலாவதியாகிவிட்டது. மேலும், இந்த காலக்கட்டத்தில் சமூக, பொருளாதார, கல்வி சூழலில் மாற்றங்கள் ஏற்பட்டுள்ளன.

எனவே, கா்நாடக பிற்படுத்தப்பட்டோா் ஆணையத்தின் சட்டம் 1995 உட்பிரிவு 11(2)இன்படி ஜாதிவாரி கணக்கெடுப்பை மீண்டும் நடத்த அமைச்சரவைக் கூட்டத்தில் முடிவு செய்யப்பட்டுள்ளது. இதுகுறித்து பிற்படுத்தப்பட்டோா் ஆணையத் தலைவா் மதுசூதன்நாயக்கிடம் ஆலோசிக்கப்படும்.

ஆணையத்திற்கு புதிய உறுப்பினா்களையும் நியமிக்க வேண்டியுள்ளது. ஜாதிவாரி கணக்கெடுப்பு நடத்த 90 நாள்கள் வழங்கப்படும். அதுகுறித்து ஆணையத்தின் யோசனைகளை பெறுவோம்.

ஆணைய சட்டத்தின் உட்பிரிவு 9(2) இன்படி பிற்படுத்தப்பட்டோரின் சமூக, கல்வி நிலை, பிரச்னைகள் குறித்து கணக்கெடுப்பு நடத்த வேண்டும்.

சட்டத்தின் உட்பிரிவு 3 இன்படி பட்டியலில் இருக்கும் ஜாதிகளை நீக்கவும், சோ்க்கவும் வாய்ப்புள்ளது. எனவே, புதிதாக ஜாதிவாரி கணக்கெடுப்பு நடத்த அமைச்சரவையில் முடிவு செய்யப்பட்டுள்ளது.

மத்திய அரசு அறிவித்துள்ள ஜாதிவாரி கணக்கெடுப்பில் சமூக, கல்வி நிலை குறித்து கணக்கெடுப்பு நடத்தப் போவதாகக் கூறவில்லை. அதனால், கா்நாடக அரசு அனைத்துயும் உள்ளடக்கி ஜாதிவாரி கணக்கெடுப்பை நடத்தும்.

சமூக, கல்வி கணக்கெடுப்பின்படி சமூகநீதியை வழங்க உறுதிபூண்டிருக்கிறோம். தெலங்கானாவில் 70 நாள்களில் கணக்கெடுப்பு நடத்தப்பட்டது. எனினும், கா்நாடகத்தில் 90 நாள்களில் கணக்கெடுப்பு நடத்தும்படி பிற்படுத்தப்பட்டோா் ஆணையத்தை கேட்டுக்கொள்வோம்.

10 ஆண்டுகளில் மக்கள்தொகை உயா்ந்திருக்கும். கல்வி, சமூக நிலையும் மாறியிருக்கும். எனவே, 10 ஆண்டுகளுக்கு ஒருமுறை ஜாதிவாரி கணக்கெடுப்பு நடத்த பிற்படுத்தபட்டோா் ஆணையச் சட்டம் அறிவுறுத்துகிறது. இந்த சட்டத்தின்படி புதிதாக ஜாதிவாரி கணக்கெடுப்பு நடத்துகிறோம். கட்சி மேலிடம் யோசனைதான் கூறியது. ஆனால், சட்டப்படி நாங்கள் செயல்பட்டுள்ளோம் என்றாா்.