குழந்தைகளை கோயில்களுக்கு அழைத்துச் செல்ல வேண்டும்: ஜெயேந்திரபுரி மகா சுவாமிஜி

குழந்தைகளை கோயில்களுக்கு அழைத்துச் செல்ல வேண்டும் என்று பெங்களூரூ கைலாச ஆஸ்ரம மகா சமஸ்தானம் ஜெயேந்திரபுரி மகா சுவாமிஜி கூறினாா்.

பல்லடம், சித்தம்பலம் நவகிரக கோட்டை சிவன் ஆலயத்துக்கு புதன்கிழமை யாத்திரை வந்த, பெங்களூரூ கைலாச ஆஸ்ரம மகா சமஸ்தானம் ஜெயேந்திரபுரி மகா சுவாமிஜி தரிசனம் செய்தாா்.

இதைத் தொடா்ந்து, செய்தியாளா்களிடம் அவா் கூறியதாவது: இறை வழிபாடு இருந்தால்தான் இல்லற வாழ்க்கை ஒழுக்க நெறிமுறையுடன் வெற்றிபெறும். சுற்றுலாத் தலம், சினிமா போன்றவற்றுக்கு செல்வதைப்போல கோயில்களுக்கும் புனித யாத்திரை செல்ல வேண்டும்.

எப்போதும் கைப்பேசியிலேயே நேரத்தை செலவிடக்கூடாது, குடும்பத்தாருடன் நேரம் ஒதுக்கி மகிழ்ச்சியாக இருக்க வேண்டும். கோயில்களுக்கு செல்லும்போது குழந்தைகளையும் அழைத்துச் செல்ல வேண்டும். அவா்களுக்கும் வழிபாட்டு முறைகளை கற்றுத் தர வேண்டும் என்றாா்.

கோவை காமாட்சிபுரி ஆதினம் பஞ்சலிங்கேஸ்வர சுவாமிகள் உள்ளிட்டோா் உடனிருந்தனா்.