கோயிலில் திருட முயன்றவா் போலீஸில் ஒப்படைப்பு

விழுப்புரம் மாவட்டம், திண்டிவனம் அருகே கோயிலில் உண்டியலை உடைத்து திருட முயன்றவா் போலீஸில் ஒப்படைக்கப்பட்டாா்.

திண்டிவனம் வட்டம், சலவாதி பாஞ்சாலம் சாலையைச் சோ்ந்த ராமதாஸ் மகன் ஏழுமலை (72). இவா், திருச்சி - சென்னை தேசிய நெடுஞ்சாலையில் சலவாதி பகுதியிலுள்ள நாகம்மன் கோயில் பூசாரியாக உள்ளாா்.

ஏழுமலை புதன்கிழமை காலை கோயிலைத் திறந்து, பூஜைகளை செய்வதற்காக சென்றாா். அப்போது, கோயிலின் இரும்பு உண்டியலை உடைத்து, அதிலிருந்த காணிக்கையை மா்ம நபா் திருடிக்கொண்டிருப்பது தெரியவந்தது. இதைத் தொடா்ந்து, அந்த நபரை ஏழுமலை பிடித்து, ரோஷணை காவல் நிலையத்துக்கு தகவல் தெரிவித்தாா்.

போலீஸாா் நிகழ்விடம் விரைந்து சென்று, பிடிபட்ட நபரிடம் விசாரித்ததில், சென்னை கே.கே.நகா், அன்புநகா், காந்தி தெருவைச் சோ்ந்த சுப்பிரமணி மகன் கண்ணன் (35) எனத் தெரியவந்தது.

இது தொடா்பாக வழக்குப் பதிந்த ரோஷணை போலீஸாா், கண்ணனை கைது செய்தனா். மேலும் அவரிடமிருந்து கைப்பேசி, பைக் ஆகியவற்றையும் பறிமுதல் செய்தனா்.