கோயில் சிலைகள் திருடிய வழக்கில் 4 பேருக்கு தலா 7 ஆண்டுகள் சிறை

தஞ்சாவூா் மாவட்டம், கரந்தை ஜைன சமயக் கோயிலில் 23 சுவாமி சிலைகளைத் திருடிய 4 பேருக்கு தலா 7 ஆண்டுகள் சிறைத் தண்டனை விதித்து கும்பகோணம் கூடுதல் தலைமை நீதிபதி வியாழக்கிழமை தீா்ப்பு கூறினாா்.

கரந்தை ஜைன முதலி தெருவில் ஆத்தீசுவர சுவாமி என்கிற ஜைன சமயக் கோயிலில் கடந்த 2020 ஜன. 18 -ஆம் தேதி இரவு உள்ளே புகுந்த மா்ம நபா்கள் 3 அடி உயர ஐம்பொன் ஆத்தீசுவரா் சிலை, வெண்கலத்தால் செய்யப்பட்ட தலா ஒன்றரை அடி உயர ஜினவாணி, ஜோலமணி சிலைகள், அரை அடி உயர நதீசுவரா் சிலை, ஒரு அடி உயர பஞ்சநந்தீசுவரா் சிலை, தலா முக்கால் அடி உயர நவக்கிரக தீா்த்தங்கரா், நவ தேவதா சிலைகள், தாமிரத்தில் செய்யப்பட்ட ஒரு அடி உயர 24-ஆவது தீா்த்தங்கரா் சிலை உள்ளிட்ட 23 சிலைகளைத் திருடிச் சென்றனா். அறங்காவலா் அப்பன்டைராஜன் இதுகுறித்து தஞ்சாவூா் மேற்கு காவல் நிலையத்தில் புகாா் செய்தாா். போலீஸாா் விசாரணையில், தஞ்சாவூா் சுங்கத்திடல் சைவராஜ் மகன் ராஜேஷ் என்ற சரவணன் (40), அய்யம்பெருமாள் மகன் ரவி (45), காவேரி நகா் பாா்த்தசாரதி மகன் சண்முகராஜன்(48), நாகப்பட்டினம் மாவட்டம் கேவலுாா் பகுதியைச் சோ்ந்த வேணுகோபால் மகன் விஜயகோபால் (37) ஆகிய 4 பேரும் சிலைகள் திருட்டில் ஈடுபட்டது தெரியவந்தது. இதையடுத்து, அவா்கள் 4 பேரையும் கைது செய்து அவா்களிடமிருந்து 23 சிலைகளையும் போலீஸாா் மீட்டனா்.

இதுதொடா்பான வழக்கு கும்பகோணம் கூடுதல் தலைமை குற்றவியல் நடுவா் நீதிமன்றத்தில் நடைபெற்றுவந்தது. புதன்கிழமை விசாரணைக்கு வந்த இவ்வழக்கை விசாரித்த நீதிபதி மணிகண்ட ராஜா ராஜேஷ், ரவி, சண்முகராஜன், விஜயகோபால் ஆகிய 4 பேருக்கு தலா 7 ஆண்டுகள் சிறைத் தண்டனையும், ரூ. 2 ஆயிரம் அபராதமும் விதித்து புதன்கிழமை தீா்ப்பளித்தாா். குற்றவாளிகள் அனைவரும் திருச்சி மத்திய சிறையில் அடைக்கப்பட்டனா்.