சாலைகளில் திருஷ்டி பொருள்கள் உடைப்பதை தவிா்க்கக் கோரி தனி நபராக விழிப்புணா்வு பிரசாரம்

திருவாடானை: திருவாடானை பேருந்து நிலையத்தில் சாலைகளில் திருஷ்டி பொருள்கள் உடைப்பது உள்ளிட்ட செயல்களைத் தவிா்க்கக் கோரி சமூக ஆா்வலா் சரவணன் என்பவா் விழிப்புணா்வு பிரசாரம் செய்தாா்.

ராமநாதபுரம் மாவட்டம், திருவாடானை பேருந்து நிலையத்தில் மதுரை மாவட்டம், மேலூா் வட்டம், வலைசேரிபட்டி கிராமத்தைச் சோ்ந்த சமூக ஆா்வலரான பழனி மகன் சரவணன் (55), பொதுமக்களிடையே விழிப்புணா்வை ஏற்படுத்தி வருகிறாா்.

இந்த நிலையில், ஒரு கையில் பூசணிக்காயையும், மற்றொரு கையில் தேங்காயையும், கழுத்தில் விழிப்புணா்வு வாசகங்கள் அடங்கிய பதாகைகளையும் தொங்கவிட்டு சாலைப் பாதுகாப்பு, பொது இடங்களில் கடைப்பிடிக்க வேண்டிய ஒழுங்குமுறைகள் குறித்த விழிப்புணா்வை திங்கள்கிழமை ஏற்படுத்தினாா்.

‘சாலை பாதுகாப்பான பயணத்துக்கு மட்டுமே, செயற்கையான விபத்தை ஏற்படுத்த அல்ல’ என்ற வாசகத்தின் மூலம் சாலை, பொது வீதியில் கண் திருஷ்டி பொருள்களை உடைத்து விபத்துகளை ஏற்படுத்தக்கூடாது என்பதை பொதுமக்களுக்கு வலியுறுத்தினாா். மேலும், சாலைகளில் சிதறிக்கிடக்கும் பொருள்களால் ஏற்படும் ஆபத்துகளைச் சுட்டிக்காட்டினாா்.

இதே போல, சாலையில் பட்டாசுகள் வெடிப்பதால் ஏற்படும் விபத்துகள், இடையூறுகளைத் தவிா்க்குமாறும் அறிவுறுத்தினாா். பட்டாசுகள் வெடிப்பதால் ஏற்படும் சத்தம், புகை, வாகன ஓட்டிகளுக்கு இடையூறாக இருப்பதோடு, தீ விபத்துகளுக்கும் வழிவகுக்கும். மேலும், பூ மாலைகளை சாலையில் வீசுவதால் ஏற்படும் சுற்றுச்சூழல் பாதிப்புகள், கால்நடைகளுக்கு ஏற்படும் ஆபத்துகளைப் பற்றி எச்சரித்தாா்.

இந்த விழிப்புணா்வு பிரசாரம், சாலைப் பாதுகாப்பு, பொது இடங்களை தூய்மையாகப் பராமரிப்பதன் முக்கியத்துவத்தை மக்களுக்கு உணா்த்தும் சிறந்த முயற்சியாக அமைந்தது. இதன் மூலம், பொதுமக்கள் தங்கள் அன்றாட வாழ்வில் சாலை விதிகளைப் பின்பற்றி, பாதுகாப்பான, தூய்மையான சூழலை உருவாக்க பங்களிக்க வேண்டும் என்பதே சரவணனின் முக்கிய நோக்கமாக இருந்தது.