சின்ன வெங்காயம் சாகுபடி செய்ய விவசாயிகள் ஆா்வம்

சத்தியமங்கலம் சுற்றுவட்டாரத்தில் சின்ன வெங்காயம் சாகுபடி செய்வதற்காக விதை வெங்காயம் வாங்குவதற்கு புன்செய்புளியம்பட்டி வாரச் சந்தைக்கு விவசாயிகள் வியாழக்கிழமை அதிக அளவில் வந்தனா்.

சத்தியமங்கலம் சுற்றுவட்டாரத்தில் அண்மையில் பெய்த மழையின் காரணமாக சின்ன வெங்காயம் சாகுபடி செய்வதற்கு விவசாயிகள் ஆா்வம் காட்டி வருகின்றனா். இதற்காக விதை வெங்காயம் வாங்க புன்செய் புளியம்பட்டி சந்தைக்கு வியாழக்கிழமை அதிக அளவில் விவசாயிகள் வந்திருந்தனா்.

ஈரோடு, திருப்பூா், கோவை, நாமக்கல் உள்ளிட்ட தமிழகத்தின் பல்வேறு மாவட்டங்களில் இருந்தும் விதை வெங்காயம் வாங்குவதற்கு விவசாயிகள் வந்தனா். வரத்து அதிகரிப்பால் விதை வெங்காயம் கிலோ ரூ. 60- இல் இருந்து ரூ.40 ஆக சரிந்தது.

விதை வெங்காய விலை குறைந்ததால் விவசாய நிலங்களில் சாகுபடி செய்வதற்காக விவசாயிகள் அதிக அளவில் விதை வெங்காயத்தை வாங்கிச் சென்றனா். கடந்த வாரத்தை விட 200 மூட்டைகள் விதை வெங்காயம் கூடுதலாக விற்பனையானதாக வியாபாரிகள் தெரிவித்தனா்.