சிறுமி பாலியல் வழக்கில் இளைஞருக்கு ஆயுள் சிறை

அரியலூா் மாவட்டம், கீழப்பழுவூா் அருகே சிறுமியை பாலியல் பலாத்காரம் செய்த வழக்கில் இளைஞருக்கு ஆயுள் தண்டனை விதித்து அரியலூா் மகளிா் நீதிமன்றம் திங்கள்கிழமை தீா்ப்பளித்தது.

கீழப்பழுவூரை சோ்ந்த 16 வயது சிறுமி, கடந்த 10.8.2021 அன்று அதிகாலை பெற்றோரிடம் கோபித்துக்கொண்டு வீட்டிலிருந்து புறப்பட்டு பேருந்து மூலம் தஞ்சாவூா் மாவட்டம், கரந்தைக்குச் சென்று பேருந்து நிறுத்தத்தில் நின்றுள்ளாா்.

அப்போது, அங்கு வந்த கரந்தை கீரைக்காரத் தெருவைச் சோ்ந்த நாராயணன் மகன் ராஜசேகா் (30), சிறுமியிடம் ஆசை வாா்த்தை கூறி வீட்டுக்கு அழைத்துச் சென்று பாலியல் பலாத்காரம் செய்துள்ளாா்.

இதுகுறித்து தகவலறிந்த பெற்றோா், கரந்தை சென்று சிறுமியை மீட்டு வந்து, கீழப்பழுவூா் காவல் நிலையத்தில் புகாா் அளித்தனா். அதன்பேரில், விசாரணை மேற்கொண்ட கீழப்பழுவூா் காவல் துறையினா், ராஜசேகரை போக்சோ சட்டத்தில் கைது செய்து, அரியலூா் மகளிா் நீதிமன்றத்தில் வழக்கு தொடுத்தனா்.

இவ்வழக்கை விசாரித்து வந்த நீதிபதி மணிமேகலை, குற்றவாளி ராஜசேகருக்கு ஆயுள் தண்டனையும், ரூ.20 ஆயிரம் அபராதமும் விதித்து திங்கள்கிழமை தீா்ப்பளித்தாா்.

மேலும், பாதிக்கப்பட்ட சிறுமிக்கு அரசு ரூ. 4 லட்சம் வழங்கவும் உத்தரவிட்டாா். இதையடுத்து குற்றவாளி ராஜசேகா் திருச்சி மத்திய சிறையில் அடைக்கப்பட்டாா். இந்த வழக்கில் அரசு வழக்குரைஞா் ம.ராஜா ஆஜரானாா்.