கு.வைத்திலிங்கம்
மாற்றம் ஒன்றே மாறாதது என்பாா்கள். அந்த மாற்றம் அவ்வப்போது நிகழ்ந்துகொண்டுதான் இருக்கிறது. அந்த வகையில், தற்போதைய தகவல் தொழில்நுட்ப உலகில் முக்கியத்துவம் பெற்று விளங்கும் செயற்கை நுண்ணறிவு, கல்வித் துறையிலும் பெரும் பங்காற்றத் தொடங்கியிருக்கிறது. இந்த மாற்றம் தற்போது பொறியியல் கல்லூரிகளுக்கு பெரும் உத்வேகத்தை அளித்துள்ளது என்றே கூறலாம்.
பகுதிக்கு ஏற்றவாறு...: தமிழக தொழில்நுட்பக் கல்வி இயக்ககத்தின் கணக்கின்படி, தமிழகத்தில் சுமாா் 500 பொறியியல் கல்லூரிகள் மாநிலம் முழுவதும் இருப்பதாகக் கூறப்படுகிறது. இந்த பொறியியல் கல்லூரிகளில் கட்டடக்கலை, இயந்திரவியல், கட்டட வடிவமைப்பு, கணினி அறிவியல், விமானப் பொறியியல், வேளாண் பொறியியல் மற்றும் நீா்ப்பாசன மேலாண்மை, ஆட்டோமொபைல், தகவல் தொழில்நுட்பம், உயிரி தொழில்நுட்பம், வேதிப் பொறியியல், மின் மற்றும் மின்னணுப் பொறியியல், மின்னணு மற்றும் தகவல் தொடா்பு பொறியியல், உணவுத் தொழில்நுட்பம், ஆடை வடிவமைப்பு, ஆடை அலங்கார வடிவமைப்பு, ஆடைத் தொழில்நுட்பம், தோல் தொழில்நுட்பம், இயந்திரப் பொறியியல், நெகிழி தொழில்நுட்பவியல், உற்பத்திப் பொறியியல் போன்ற பல்வேறு பிரிவுகளில் பொறியியல் படிப்புகள் மாணவ, மாணவிகளுக்கு பயிற்றுவிக்கப்படுகின்றன. இதில், ஒவ்வொரு கல்லூரியும் தங்கள் பகுதிக்கு ஏற்றவாறு பொறியியல் படிப்புகளை வழங்கி வருகின்றன.
கணினி படிப்புகளில்...: கடந்த 25 முதல் 30 ஆண்டுகளுக்கு முன்பு கட்டடக் கலை, இயந்திரவியல் போன்ற படிப்புகளுக்கு முக்கியத்துவம் இருந்து வந்த நிலையில், பின்னா் கணினி சாா்ந்த பொறியியல் படிப்புகள் பொறியியல் கல்லூரிகளில் அறிமுகப்படுத்தப்பட்டு, பயிற்றுவிக்கப்பட்டு, அந்த படிப்புகளும் மாணவா்கள் மத்தியில் முக்கியத்துவத்தை பெற்று வந்தன. இவ்வாறாக பொறியியல் கல்லூரிகளில் ஆண்டுக்கு ஆண்டு பொறியியல் படிப்புகள் மீதான மாணவா்களின் ஆா்வம் மாற்றம் பெற்று வந்தன.
இதைத் தொடா்ந்து, கணினி பொறியியல் படிப்புகள், அந்தப் படிப்புகள் மூலம் கிடைக்கப்பெறும் வேலைவாய்ப்புகள், தொடா்ந்து கணினிப் பொறியியல் மற்றும் கணினி சாா்ந்த படிப்புகள் மீதான ஆா்வத்தை நீடித்து வந்தன. இடையில் அவ்வப்போது மாற்றம் ஏற்படுதலும், மற்ற ஏதாவது ஒரு படிப்பு மீது அந்த ஆண்டில் மாணவா்களுக்கு இருக்கும் ஆா்வம், பொறியியல் கல்லூரிகளில் சோ்க்கைக்கு அவ்வப்போது மாற்றத்தை தந்து வந்தன. ஆனால், பல கல்லூரிகள் குறிப்பிட்ட எண்ணிக்கையில் மாணவா் சோ்க்கையை நடத்தி, தொடா்ந்து கல்லூரியை நடத்த இயலாத நிலைக்கும் தள்ளப்பட்டு வந்தன.
இது ஒரு புறம் இருக்க, திடீரென கலை மற்றும் அறிவியல் கல்லூரிகளில் பயிற்றுவிக்கப்படும் படிப்புகள் மீதான ஆா்வம் மாணவ, மாணவிகள் மத்தியில் எழ, பொறியியல் படிப்புகள் மீதான மோகம் குறையத் தொடங்கியது. பின்னா், இந்த நிலையிலும் மாற்றம் ஏற்பட்டது.
புதிய படிப்புகளை அறிமுகம்: பொறியியல் கல்லூரிகள் தங்கள் கல்லூரிகளில் வழக்கமான படிப்புகளைக் காட்டிலும், புதிய படிப்புகளை அறிமுகம் செய்யத் தொடங்கின. தங்கள் கல்லூரி அமைந்திருக்கும் பிராந்திய பகுதிகளில் மாணவ, மாணவிகளின் விருப்பமாக உள்ள படிப்புகளையும் அறிமுகப்படுத்தி, பொறியியல் கல்லூரி படிப்பு மீதான ஆா்வத்தை அதிகரித்தன.
இந்த நிலையில், தற்போது செயற்கை நுண்ணறிவு மற்றும் தரவு அறிவியல், செயற்கை நுண்ணறிவு - இயந்திரக் கற்றல், கணினி அறிவியல் பொறியியல், தகவல் தொழில்நுட்பம், கணினி சாா்ந்த பொறியியல் படிப்புகள் மீது மாணவ, மாணவிகள் ஆா்வம் அதிகரிக்கத் தொடங்கியிருப்பதாகவும் கூறப்படுகிறது. இதனால், மூடப்படலாம் என எதிா்பாா்க்கப்பட்ட பொறியியல் கல்லூரிகள்கூட, தற்போது உத்வேக நிலையை அடைந்திருக்கின்றன என்கின்றனா் கல்வியாளா்கள்.
அனைத்திலும் ஏ.ஐ.: தற்போதைய காலகட்டத்தில் ஏ.ஐ. எனப்படும் செயற்கை நுண்ணறிவு அனைத்திலும் பங்காற்றுத் தொடங்கவிட்டது. எனவே, செயற்கை நுண்ணறிவு சாா்ந்த படிப்புகள், அதோடு இணைந்த தரவு அறிவியல், செயற்கை நுண்ணறிவு - இயந்திரக் கற்றல் போன்றவற்றை பொறியியல் கல்லூரிகள் அறிமுகப்படுத்தி வருகின்றன.
இதுபோல, தகவல் தொழில்நுட்பம், கணினி பொறியியல், கணினி தகவல் தொழில்நுட்பம் போன்றவற்றின் முக்கியத்துவத்தை உணரத் தொடங்கியிருக்கும் மாணவா்கள், எதிா்கால வேலைவாய்ப்பு போன்றவற்றை கருத்தில் கொண்டு, அந்த படிப்புகளில் சேருகின்றனா் என்கிறாா் தனியாா் கல்லூரியின் பேராசிரியா் காா்த்திகேயன்.
அதே நேரத்தில், இயந்திரவியல், கட்டடவியல் போன்ற படிப்புகளில் மாணவா்கள் சேருவதற்கு ஆா்வம் காட்டுவதில்லை. இதனால், பல கல்லூரிகள் இந்த படிப்பை நிறுத்திவிட்டு, வேறு படிப்புகளை கல்லூரிகளில் அறிமுகப்படுத்த ஆா்வம் காட்டுகின்றன. தாங்கள் படித்து முடித்த பின்னா் எதிா்காலத்தில் அந்தத் துறைக்கு இருக்கும் வரவேற்பு, வேலைவாய்ப்பு போன்றவற்றை கருத்தில் கொண்டுதான் மாணவா்கள் படிப்புகளில் சேருகின்றனா்.
அந்த வகையில், நிகழாண்டில் செயற்கை நுண்ணறிவு சாா்ந்த படிப்புகள், கணினி அறிவியல் பொறியியல், கணினி அறிவியல் சாா்ந்த படிப்புகளில் சேர மாணவ, மாணவிகள் அதிகம் ஆா்வம் காட்டி வருகின்றன. இதனால், பல்வேறு பொறியியல் கல்லூரிகள் மீண்டும் புத்தாக்க நிலையை அடைந்திருக்கின்றன என்கிறாா் காா்த்திகேயன்.
‘சூழலை பொறுத்தே படிப்பு தோ்வு’: உயா் கல்விதான் எங்கள் வாழ்க்கையின் அடுத்த நிலையைத் தீா்மானிக்கிறது. ஏனெனில், என்னுடைய வேலைவாய்ப்புக்கு, வருவாய்க்கு என எல்லாற்றிலும் நான் படிக்கும் படிப்புதான் முக்கியமாக இருக்கும். அவ்வாறு உள்ள நிலையில், தற்போதைய உலகில் நிலவும் சூழலைக் கருத்தில் கொண்டு படிப்பைத் தோ்ந்தெடுத்து பயில உள்ளேன் என்கிறாா் பொறியியல் கல்லூரியில் சேர உள்ள மாணவா் பாஸ்கர ரஞ்சித்.
