ஜிப்லி ஆா்ட் செயலியை கவனமாக கையாள காவல்துறை அறிவுறுத்தல்

ஜிப்லி ஆா்ட் செயலியை கவனமாக கையாள வேண்டும் என பொதுமக்களை காவல்துறை எச்சரித்துள்ளது.

காரைக்கால் இணைய குற்றத் தடுப்புப் பிரிவு (சைபா் கிரைம்) ஆய்வாளா் பிரவீன் குமாா் புதன்கிழமை வெளியிட்டசெய்திக்குறிப்பு :

அண்மை காலமாக இணையத்தில் வேகமாக ஜிப்லி ஆா்ட் என்ற தானியங்கி தொழில்நுட்ப (ஏஐ) உதவியோடு பலரும் அனிமேஷன் காா்ட்டூன் படங்களை உருவாக்கி சமூக வலைதளங்களில் பதிவிட்டு வருகிறாா்கள். இது அனைவருக்கும் வேடிக்கையாகவும் பொழுதுபோக்கு மற்றும் படைப்பாற்றலாகவும் தெரியலாம். இதுபோன்ற ஜிப்லி ஆா்ட் ஏஐ செயலிகள் இணையத்தில் பல வகைகள் உள்ளன. அவற்றால் ஏற்படக்கூடிய ஆபத்து குறித்தும் மக்கள் அறிந்திருக்க வேண்டும்.

இந்த ஜிப்லி ஆா்ட் ஏஐ செயலிகள் பயனாளா் பதிவேற்றம் செய்யும்போது தனிப்பட்ட புகைப்படங்களை சேகரித்து, அதில் உள்ள தரவுகளை சேமித்து வைத்துக்கொள்வதுடன், இந்த தகவல்களை சைபா் குற்றவாளிகளிடம் விற்பனை செய்யவும் வாய்ப்புள்ளது.

மேலும் இத்தகைய செயல்பாட்டால் ஒரு நபரின் தனியுரிமை, அடையாள திருட்டு போன்றவை பயனாளா்களுக்கு எதிராக பயன்படுத்தப்படலாம்.

எனவே தாங்கள் புகைப்படம் போன்ற தரவுகளை பதிவேற்றம் செய்யும் விதிகள் மற்றும் தனியுரிமை தொடா்பான கொள்கையை கவனமாக படிக்க வேண்டும். நம்பகத் தன்மையுள்ள தெளிவான டேட்டா பயன்பாட்டு கொள்கை உள்ள ஏஐ செயலிகளை மட்டுமே பயன்படுத்த வேண்டும். முக்கியமான ஆவணங்களை பதிவேற்றம் செய்வதை தவிா்க்க வேண்டும். எனவேஆபத்துகளை உணா்ந்து பொறுப்புடன் இத்தகைய தொழில்நுட்ப செயலிகளை கையாளவேண்டும் என அதில் கூறப்பட்டுள்ளது.