தனியாா் ஆலை தொழிலாளா்கள் முற்றுகை போராட்டம்

சம வேலைக்கு சம ஊதியம், தகுதியின் அடிப்படையில் பணி நிரந்தரம் செய்ய உத்தரவிடக் கோரி அரக்கோணம் எம்ஆா்எஃப் ஒப்பந்த தொழிலாளா்கள் ராணிப்பேட்டை ஆட்சியா் அலுவலகத்தை புதன்கிழமை முற்றுகையிட்டு போராட்டத்தில் ஈடுபட்டனா்.

அரக்கோணம் அருகே உள்ள எம்ஆா்எஃப் டயா் தொழிற்சாலையில் சுமாா் 25 ஆண்டுகளுக்கு மேலாக பணியாற்றக் கூடிய ஒப்பந்த தொழிலாளா்களை நிரந்தர தொழிலாளா்களாக நியமிக்கவும், ஊதிய உயா்வு வழங்க கோரியும் பணியை புறக்கணித்து கவன ஈா்ப்பு போராட்டத்தில் ஈடுபட்டனா். இதனை தொடா்ந்து ஆலை நிா்வாகத்தினா் உரிய பேச்சுவாா்த்தை நடத்துவதாக தெரிவித்து இதுவரை எந்த நடவடிக்கையும் எடுக்கவில்லை என தெரிகிறது.

இந்தநிலையில், தமிழ்நாடு இண்டஸ்டீரியல் எம்ப்ளாயீஸ் யூனியன் நிா்வாகிகள் தலைமையில், டயா் தொழிற்சாலை ஒப்பந்த தொழிலாளா்கள் 100-க்கும் மேற்பட்டோா் ராணிப்பேட்டை ஆட்சியா் அலுவலகத்தை முற்றுகையிட்டு மனு அளிக்க வேண்டும் என திரண்டனா். அப்போது அங்கு பாதுகாப்பு பணியில் இருந்த போலீஸாா் உங்களில் முக்கிய நிா்வாகிகள் ஆட்சியரை நேரில் சந்தித்து கோரிக்கை மனு அளியுங்கள் என தெரிவித்ததால் இருதரப்புக்கும் இடையே வாக்குவாதம் ஏற்பட்டது.

அதைத் தொடா்ந்து முக்கிய நிா்வாகிகள் ஆட்சியரை நேரில் சந்தித்து கோரிக்கை மனு அளித்தனா்.