திருப்பத்தூா்: 22,326 மனுக்களில் 586 மனுக்களுக்கு தீா்வு -ஆட்சியா் தகவல்

திருப்பத்தூா் மாவட்டத்தில் ‘உங்களுடன் ஸ்டாலின்’ முகாம்களில் பெறப்பட்ட 22,326 மனுக்களில் 586 மனுக்களுக்கு தீா்வு காணப்பட்டதாக ஆட்சியா் க.சிவசௌந்திரவல்லி தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பு

திருப்பத்தூா் மாவட்டத்தில் கடந்த 15.7.2025 முதல் 5.8.2025 வரை 72 இடங்களில் முகாம்கள் நடைபெற்றுள்ளனது. இந்த முகாம்களின் மூலம் 22,326 மனுக்கள் பெறப்பட்டன. இவற்றில் 586 மனுக்களுக்கு தீா்வு காணப்பட்டு உள்ளது.

திருப்பத்தூா் அருகே அகரம் அடுத்த கரும்பூா் பகுதியைச் சோ்ந்த செந்தில்குமாா் மனைவி மணிமேகலை கூறியது:மாடப்பள்ளி பகுதியில் நடைபெற்ற முகாமில் கலந்து கொண்டு மருத்துவ காப்பீடு அட்டை வேண்டி விண்ணப்பித்தேன். என் விண்ணப்பத்தின் மீது உடனடியாக நடவடிக்கை மேற்கொண்டு மருத்துவ காப்பீடு அட்டை எனக்கு வழங்கப்பட்டது. முகாம் மூலம் எனக்கு உடனடியாக தீா்வு கிடைத்துள்ளது.இந்த திட்டத்தை கொண்டு வந்த முதல்வருக்கு நன்றி தெரிவித்தாா்.

கடனுதவி...செலந்தம்பள்ளி கிராமத்தை சோ்ந்த மாற்றுத்திறனாளி கணேசன் கூறியது: நான் துணிக்கடை ஒன்று வைத்து நடத்தி வருகிறேன்.அந்த துணிக்கடையை மேலும் விரிவாக்கம் செய்ய கடனுதவிக்காக மாடப்பள்ளி பகுதியில் நடைபெற்ற முகாமில் கலந்துகொண்டு ரூ.1 லட்சம் கடனுதவி கேட்டு மனு அளித்தேன். இதற்கு உடனடியாக நடவடிக்கை எடுக்கப்பட்டு கடனுதவி பெற வங்கி பரிந்துரை கடித்தத்தினை அதிகாரிகள் வழங்கினா். எனவே இந்த உதவிக்கு முதல்வருக்கு நன்றி என கூறினாா்.