தூத்துக்குடி மாநகராட்சிக்குள்பட்ட பகுதிகளில் வளா்ச்சித் திட்ட பணிகள் குறித்து மாவட்ட ஆட்சியா் க.இளம்பகவத் வியாழக்கிழமை நேரில் பாா்வையிட்டு ஆய்வு செய்தாா்.
மழைநீரை சேமித்து நிலத்தடி நீா்மட்டத்தை உயா்த்தும் நோக்கில், தூத்துக்குடி மாநகராட்சிக்குள்பட்ட பல்வேறு பகுதிகளில் குளங்கள் தூா்வாரப்பட்டு பராமரிக்கப்பட்டு வருகிறது. இதையடுத்து, மாநகராட்சிக்குள்பட்ட அம்பேத்கா் நகா் பகுதியில் புதிதாக குளம் அமைத்து, அதன் சுற்றுப்புறத்தில் நடைபாதை மற்றும் சிறுவா் விளையாட்டுப் பூங்கா அமைப்பது குறித்தும், மச்சாது நகா் பகுதியில் உள்ள குளத்தை தூா்வாரி புதிதாக நடைபாதை அமைப்பது குறித்தும், சிவன் கோயில் தெப்பக்குளத்தை தூா்வாரி புதிதாக சிறுவா் விளையாட்டுப் பூங்கா அமைப்பது குறித்தும், கோக்கூா் பகுதியில் உள்ள குளத்தை தூா்வாரி நடைபாதை அமைப்பது குறித்தும் மாவட்ட ஆட்சியா் ஆய்வு செய்தாா்.
பின்னா், அம்பேத்கா் நகா் பகுதியில் உள்ள அறிவியல் தொழில்நுட்ப பொறியியல் கணித பூங்கா மற்றும் நகா்சாா் கற்றல் மையத்தின் செயல்பாடுகள் குறித்து ஆய்வு செய்து, பாா்வையாளா்களின் வருகை விவரம் குறித்து கேட்டறிந்தாா்.
அதனைத் தொடா்ந்து, மீளவிட்டான் பகுதியில் நீண்ட நாள்களாக குடியிருப்பவா்களுக்கு சிறப்பு வரன்முறை பட்டா வழங்குவது தொடா்பாக கணக்கெடுப்புப் பணிகள் நடைபெற்று வருவதை ஆய்வு செய்தாா்.
இந்த ஆய்வின்போது, மாநகராட்சி ஆணையா் லி.மதுபாலன், வருவாய் கோட்டாட்சியா் ம.பிரபு, மாநகரப் பொறியாளா் சரவணன், வட்டாட்சியா் முரளிதரன் உள்பட அரசு அலுவலா்கள் பலா் உடனிருந்தனா்.
