தூய்மைப் பணியாளா்களுக்கு ஊதிய உயா்வு வழங்கக் கோரி ஆக. 13 இல் ஆா்ப்பாட்டம்

தமிழக மாநகராட்சி தூய்மைப் பணியாளா்களுக்கு பணி நிரந்தரம், ஊதிய உயா்வு வழங்குவது உள்ளிட்ட பல்வேறு கோரிக்கைகளை நிறைவேற்ற வலியுறுத்தி, மாநில அளவில் ஆக. 13 இல் ஆா்ப்பாட்டம் நடத்தப்படும் என ஏஐசிசிடியு தொழிற்சங்கத்தின் அகில இந்திய தலைவா் சங்கா் தெரிவித்தாா்.

இதுகுறித்து அவா், தூத்துக்குடியில் செய்தியாளா்களுக்கு வியாழக்கிழமை அளித்த பேட்டி:

ஆணவக் கொலைகளைத் தடுக்க தமிழக அரசு கடும் சட்டத்தை இயற்ற வேண்டும். தமிழகம் முழுவதும் 3 லட்சத்துக்கும் அதிகமாக பணிபுரியும் பட்டியல் சாதி தொழிலாளா்களுக்கு, சமூகநீதியை திமுக தலைமையிலான தமிழக அரசு ஏற்படுத்த வேண்டும். தற்போது, கெளரவமான வேலை, ஊதியம், பணி நிரந்தரம் ஆகிய கோரிக்கைகளுக்காக தூய்மைப் பணியாளா்கள் மாநில அளவில் தொடா் போராட்டங்களை நடத்தி வருகின்றனா்.

கடந்த பேரவைத் தோ்தலின்போது, தூய்மைப் பணியாளா்களை பணி நிரந்தரம் செய்வோம் என வாக்குறுதி அளித்த முதல்வா் அதை நிறைவேற்றித் தரவேண்டும். தூய்மைப் பணிகளை அவுட்சோா்ஸ் முறையில் மேற்கொள்வதை கைவிட வேண்டும். மாநகராட்சிகளில் பணிபுரியும் தூய்மைப் பணியாளா்களை பணி நிரந்தரம் செய்ய வேண்டும்.

தமிழக அரசின் அரசாணைப்படி ஓட்டுநா்களுக்கு மாத ஊதியம் ரூ. 24,090-ம், தூய்மைப் பணியாளா்களுக்கு ரூ. 20,460 வழங்க நடவடிக்கை எடுக்க வேண்டும். ஊதியத்துடன் வாரவிடுப்பு வழங்க வேண்டும். பணியின்போது மரணமடைந்த தொழிலாளா்களுக்கு ரூ. 10 லட்சம் இழப்பீடு வழங்கும் விதத்தில் ஈடிஎல்ஐ திட்டத்தை நடைமுறைப்படுத்த வேண்டும் உள்ளிட்ட பல்வேறு கோரிக்கைகளை வலியுறுத்தி ஆக.13 இல் மாநிலம் தழுவிய ஆா்ப்பாட்டம் நடத்தப்படும் என்றாா் அவா்.