நாடாளுமன்ற மழைக்கால கூட்டத்தொடா் வியாழக்கிழமை (ஆக.21) நிறைவடைய உள்ள நிலையில், மக்களவை மற்றும் மாநிலங்களவையில் செவ்வாய்க்கிழமையும் அமளி நீடித்தது.
பிகாா் வாக்காளா் பட்டியல் சிறப்பு தீவிர திருத்தம் குறித்து விவாதிக்க வலியுறுத்தி காங்கிரஸ் உள்ளிட்ட எதிா்க்கட்சி எம்.பி.க்கள் பதாகைகளை ஏந்தி மக்களவையில் செவ்வாய்க்கிழமை முழக்கங்களை எழுப்பினா்.
அவா்களின் கூச்சலுக்கு இடையே கேள்வி நேரத்தை நடத்தி பல்வேறு மத்திய அமைச்சகங்கள் மற்றும் துறைகள் தொடா்பாக கேள்விகளை எழுப்புமாறு எம்.பி.க்களை கேட்டுக்கொண்டு, அலுவல்களைத் தொடர அவைத் தலைவா் ஓம் பிா்லா முயற்சித்தாா்.
எனினும் எதிா்க்கட்சியினரின் தொடா் அமளியால் நண்பகல் 12 மணி வரை, அவை ஒத்திவைக்கப்பட்டது. பின்னா் அவை கூடியபோது தெலுங்கு தேசம் கட்சி எம்.பி. கிருஷ்ண பிரசாத் அவையை வழிநடத்தினாா். அப்போது அவையின் மையப் பகுதியில் திரண்டு எதிா்க்கட்சியினா் முழக்கங்களை எழுப்பினா். அவா்களை இருக்கைக்குத் திரும்பி, அவை அலுவல்களுக்கு ஒத்துழைப்பு வழங்குமாறு கிருஷ்ண பிரசாத் வலியுறுத்தினாா். இதை கேட்காமல் அவா்கள் தொடா்ந்து அமளியில் ஈடுபட்டதால், பிற்பகல் 2 மணி வரை அவை ஒத்திவைக்கப்பட்டது.
அஸ்ஸாமில் ஐஐஎம்-மசோதா நிறைவேற்றம்: அமளிக்கும் இடையிலும் அஸ்ஸாமின் குவாஹாட்டி நகரில் இந்திய மேலாண்மை கல்வி நிறுவனத்தை (ஐஐஎம்) அமைக்கும் மசோதா மக்களவையில் குரல் வாக்கெடுப்பு மூலம் நிறைவேற்றப்பட்டது. பின்னா் நாள் முழுவதும் அவை ஒத்திவைக்கப்பட்டது.
இதேபோல பிகாா் வாக்காளா் பட்டியல் சிறப்பு தீவிர திருத்தத்தில் நிகழ்ந்த முறைகேடுகள் குறித்து விவாதிக்க வலியுறுத்தி, மாநிலங்களவையில் எதிா்க்கட்சி எம்.பி.க்கள் அமளியில் ஈடுபட்டனா். அவா்களின் தொடா் முழக்கம் அலுவல்களுக்கு இடையூறை ஏற்படுத்தியதால், அவை ஒத்திவைக்கப்பட்டது.
‘அவைக் குறிப்பிலிருந்து நீக்கப்பட்டதை பகிரக் கூடாது’: உணவு இடைவெளிக்குப் பிறகு மாநிலங்களவை மீண்டும் கூடியபோது, அவைக் குறிப்பில் இருந்து நீக்கப்பட்ட எதிா்க்கட்சித் தலைவா் மல்லிகாா்ஜுன காா்கேயின் பேச்சுகள் அடங்கிய காணொலிகளை, அவா் சமூக ஊடகத்தில் பகிா்வதாக பாஜக எம்.பி. ராதாமோகன்தாஸ் அக்ரவால் குற்றஞ்சாட்டினாா். அப்போது அவையை வழிநடத்திய பாஜக எம்.பி. கன்ஷியாம் திவாரி, ‘அவைக் குறிப்பில் இருந்து நீக்கப்பட்ட எதுவும், சமூக ஊடகத்தில் பகிரப்படக் கூடாது’ என்று தெரிவித்தாா்.
கனிம திருத்த மசோதா நிறைவேற்றம்: மாநிலங்களையில் சுரங்கங்கள் மற்றும் கனிமங்கள் திருத்த மசோதா குரல் வாக்கெடுப்பு மூலம் செவ்வாய்க்கிழமை நிறைவேற்றப்பட்டது. இந்த மசோதா மீதான விவாதத்தில் சுமாா் 19 எம்.பி.க்கள் மட்டும் பங்கேற்று ஆக்கபூா்வமான சில பரிந்துரைகளை வழங்கினா். கடந்த ஆக.12-ஆம் தேதி இந்த மசோதா மக்களவையில் நிறைவேற்றப்பட்டது.
22 மொழிகளில் மொழிபெயா்ப்பு: மக்களவை செவ்வாய்க்கிழமை காலை 11 மணிக்கு கூடியபோது, இனி அரசமைப்புச் சட்டத்தின் 8-ஆவது அட்டவணையின் கீழ் இடம்பெற்றுள்ள அனைத்து மொழிகளிலும் (22 மொழிகள்) அவை அலுவல்கள் மொழிபெயா்க்கப்படும் என்று அவைத் தலைவா் ஓம் பிா்லா தெரிவித்தாா். இதுவரை 19 மொழிகளில் அவை அலுவல்கள் மொழிபெயா்க்கப்பட்ட நிலையில், காஷ்மீரி, கொன்கனி மற்றும் சந்தாலி மொழிகளில் கூடுதலாக மொழிபெயா்ப்பு மேற்கொள்ளப்படும் என்று அவா் அறிவித்தாா்.
கடந்த ஜூலை 21-ஆம் தேதி தொடங்கிய நாடாளுமன்ற மழைக்கால கூட்டத்தொடா், வியாழக்கிழமை (ஆக.21) நிறைவடைய உள்ளது. எனினும் ‘ஆபரேஷன் சிந்தூா்’ குறித்த விவாதத்தை தவிர, நாடாளுமன்றத்தின் இரு அவைகளும் மிக குறைந்த அளவில்தான் ஆக்கபூா்வமான அலுவல்களை மேற்கொண்டுள்ளன.
