தமிழகம் முழுவதும் திங்கள்கிழமை (ஜூன் 2) பள்ளிகள் திறக்கப்படவுள்ளதையடுத்து, தூத்துக்குடி மாவட்டத்தில் உள்ள பள்ளிகளை தயாா்படுத்தும் பணிகள் தீவிரமாக நடைபெற்று வருவதாக மாவட்ட ஆட்சியா் க.இளம்பகவத் தெரிவித்தாா்.
இது குறித்து அவா் செய்தியாளா்களிடம் கூறியது: தமிழகத்தில் கோடை விடுமுறைக்கு பின்னா் திங்கள்கிழமை (ஜூன் 2) அனைத்துப் பள்ளிகளும் திறக்கப்படும் என பள்ளி கல்வித்துறை அறிவித்துள்ளது. அதன்படி தூத்துக்குடி மாவட்டத்தி உள்ள அனைத்துப் பள்ளிகளையும் தயாா்நிலையில் வைக்குமாறு, அந்தந்த முதன்மை கல்வி அலுவலா், வட்டார கல்வி அலுவலா்கள், தலைமை ஆசிரியா்களுக்கு அறிவுறுத்தப்பட்டுள்ளது.
இதைத் தொடா்ந்து பள்ளிகளுக்கு வண்ணம் அடித்தல், பள்ளி வகுப்பறை தூய்மைப் பணி உள்ளிட்ட பணிகள் தீவிரமாக நடைபெற்று வருகின்றன. மேலும், பள்ளிகள் திறக்கும் நாளிலேயே மாணவா்களுக்கு நோட்டுப் புத்தகங்கள், சீருடைகள் வழங்கப்படும் வகையில் தயாராக உள்ளன என்றாா்.
மேயா் ஆய்வு: பள்ளிகள் திறப்பை முன்னிட்டு, தூத்துக்குடி மாநகராட்சி பள்ளிகளில் மேயா் ஜெகன் பெரியசாமி சனிக்கிழமை ஆய்வு மேற்கொண்டாா். மாநகராட்சிக்குள்பட சாமுவேல்புரம் சி.வ. அரசு மேல்நிலைப் பள்ளி உள்ளிட்ட பள்ளிகளில் நீா்தேக்க தொட்டி, கழிவறை, விளையாட்டு மைதானம், வகுப்பறைகள் ஆகியவற்றை ஆய்வு செய்தாா்.
இந்த ஆய்வின் போது மாநகராட்சி ஆணையா் லி.மதுபாலன், மாநகராட்சி இளநிலை பொறியாளா் சரவணன், நகர அமைப்பு திட்ட உதவி பொறியாளா் முனீா் அகமது, வடக்கு மண்டலத் தலைவா் நிா்மல்ராஜ். சுகாதாரக் குழு தலைவா் சுரேஷ்குமாா், சுகாதார ஆய்வாளா்கள் ராஜசேகா், ராஜபாண்டி உள்ளிட்டோா் பங்கேற்றனா்.
