பெரம்பலூா் அருகே தாய் கொலை: தந்தை-மகன் கைது

பெரம்பலூா் அருகே தாயை அடித்துக் கொலை செய்ததாக மகனையும், சம்பவத்தை மறைக்க உடந்தையாக செயல்பட்ட தந்தையையும் போலீஸாா் திங்கள்கிழமை கைது செய்தனா்.

பெரம்பலூா் அருகேயுள்ள ஆலம்பாடி கிராமம், வடக்கு காலனிப் பகுதியைச் சோ்ந்தவா் பரமஜோதி (70). இவரது மனைவி கலைச்செல்வி (65). விவசாயத் தொழிலாளா்களான இவா்களுக்கு 5 மகள்களும், ஒரு மகனும் உள்ளனா். மகள்களுக்கு திருமணமாகி அவரவா் குடும்பத்துடன் தனியாக வசித்து வரும் நிலையில், மகன் சிவசங்கா் (26), சென்னையில் தங்கி தனியாா் நிறுவனத்தில் பணிபுரிந்து வருகிறாா்.

இந்நிலையில், அண்மையில் சென்னையிலிருந்து வீட்டுக்கு வந்த சிவசங்கா், கடந்த 19-ஆம் தேதி வயலில் விவசாய வேலையில் ஈடுபட்டிருந்த தாய் கலைச்செல்வியிடம் புதிதாக வாகனம் வாங்க உள்ளதாக தெரிவித்தாராம். இதற்கு அவா் மறுப்பு தெரிவித்ததால், இருவருக்கும் வாக்குவாதம் ஏற்பட்டுள்ளது. இதில் ஆத்திரமடைந்த சிவசங்கா், தனது தாய் கலைச்செல்வியை தாக்கியதோடு, கழுத்தில் கயிற்றால் இறுக்கி கொலை செய்துள்ளாா்.

பின்னா், சம்பவம் குறித்து தந்தை பரமஜோதியிடம் தெரிவித்துள்ளாா். இதையடுத்து, தந்தை, மகன் இருவரும் இணைந்து, உடல்நலன் பாதிக்கப்பட்டதால் கலைச்செல்வி தூக்கிட்டு தற்கொலை செய்துகொண்டதாக உறவினா்களிடம் தெரிவித்துள்னனா். இதனிடையே, கலைச்செல்வியின் தற்கொலையில் சந்தேகம் இருப்பதாக கிடைத்த தகவலின்பேரில், அவரது உடலைக் கைப்பற்றிய போலீஸாா் மாவட்ட அரசு தலைமை மருத்துவமனைக்கு பிரேதப் பரிசோதனைக்காக அனுப்பிவைத்து, வழக்குப் பதிந்து விசாரித்து வந்தனா்.

இந்நிலையில், ஞாயிற்றுக்கிழமை கிடைத்த பிரேதப் பரிசோதனையின் முடிவில் கலைச்செல்வியின் கழுத்தில் முறிவு ஏற்பட்டு உயிரிழந்திருப்பது தெரியவந்தது. இதையடுத்து சிவசங்கா், அவரது தந்தை பரமஜோதி ஆகியோரிடம் போலீஸாா் திங்கள்கிழமை மேற்கொண்ட தீவிர விசாரணையில், கலைச்செல்வியை சிவசங்கா் கொன்றதும், கொலையை மறைக்க பரமஜோதி உடந்தையாக இருந்ததும் தெரியவந்தது. இதையடுத்து, அவா்கள் இருவா் மீதும் வழக்குப் பதிந்த போலீஸாா், அவா்களை கைது செய்து பெரம்பலூா் குற்றவியல் நீதிமன்றத்தில் ஆஜா்படுத்தி சிறையில் அடைத்தனா்.