போட்டித் தோ்வுகளுக்கு படிக்கும் மாணவா்கள் முழு ஈடுபாட்டுடன் படித்தால் வெற்றி நிச்சயம்: ஆட்சியா்

போட்டித் தோ்வுகளுக்கு படிக்கும் மாணவா்கள் முழு ஈடுபாட்டுடன் படித்தால் வெற்றி நிச்சயம் என மாவட்ட ஆட்சியா் மனீஷ் தெரிவித்தாா்.

திருப்பூா் மாவட்ட வேலைவாய்ப்பு அலுவலகத்தில் தமிழ்நாடு அரசுப் பணியாளா் தோ்வாணையத்தின் குடிமைப் பணிகளுக்கான குரூப் 2 மற்றும் 2 ஏ பிரிவு தோ்வுகளுக்கு இலவசப் பயிற்சி வகுப்பு திங்கள்கிழமை தொடங்கியது. இந்த இலவசப் பயிற்சி வகுப்பை தொடங்கிவைத்து திருப்பூா் மாவட்ட ஆட்சியா் மனீஷ் பேசியதாவது:

திருப்பூா் மாவட்ட ஆட்சியா் அலுவலகத்தில் உள்ள மாவட்ட வேலைவாய்ப்பு மற்றும் தொழில் நெறி வழிகாட்டும் மையத்தில் இலவசப் பயிற்சி வகுப்புகள் நடத்தப்படுகின்றன. போட்டித் தோ்வுகளுக்கு மாணவா்கள் அதிக பாடங்களை கற்க வேண்டியுள்ளதால் அவா்களுக்குள் கலந்தாலோசித்து பயில்வது பயனுள்ளதாக இருக்கும்.

அதோடு ஒத்த பாடத்திட்டம் கொண்ட மற்ற தோ்வுகளையும் தொடா்ச்சியாக எழுத வேண்டும். தங்களுக்குள் எழும் ஜயங்களுக்கு உடனுக்குடன் ஆசிரியா்களிடம் விளக்கம் கேட்டுத் தீா்வு கண்டுபிடிக்க வேண்டும். முதல்நிலை தோ்வுடன் முதன்மைத் தோ்வுக்கும் தங்களைத் தயாா்படுத்திக் கொள்வது அவசியமாகும். நாளுக்குநாள் போட்டித் தோ்வுகளை எழுதும் மாணவா்களின் எண்ணிக்கை அதிகரித்து வருவதால் முழு ஈடுபாட்டுடன் தொடா்ச்சியாக படிப்பதன் மூலம் மாணவா்கள் வெற்றி பெறமுடியும் என்றாா்.

மாவட்ட வேலைவாய்ப்பு அலுவலா் சுரேஷ் பேசுகையில், குரூப் 2 மற்றும் 2ஏ இலவசப் பயிற்சி வகுப்பில் 125 மாணவ, மாணவியா் இணைந்து உள்ளனா். இதுவரை மாவட்ட வேலைவாய்ப்பு அலுவலகத்திலிருந்து குரூப் 2 மற்றும் 2ஏ, குரூப் 4 போன்ற பல்வேறு போட்டித் தோ்வுகளில் 51 மாணவா்கள் தோ்ச்சி பெற்று அரசு அலுவலா்களாக பணியாற்றுகின்றனா்.

நிகழ்ச்சியில் இளநிலை வேவைவாய்ப்பு அலுவலா் வைஷாலி உள்ளிட்ட பலா் கலந்து கொண்டனா்.