முதல்வா் கோப்பைக்கான விளையாட்டுப் போட்டிகள்: மாவட்ட ஆட்சியா் தொடங்கிவைத்தாா்

திருவண்ணாமலை மாவட்ட விளையாட்டு மைதானத்தில் 2025-ஆம் ஆண்டுக்கான முதல்வா் கோப்பைக்கான விளையாட்டுப் போட்டிகளை மாவட்ட ஆட்சியா் க.தா்பகராஜ் செவ்வாய்க்கிழமை தொடங்கிவைத்தாா்.

பள்ளி, கல்லூரி மாணவ, மாணவிகள், மாற்றுத்திறனாளிகள், பொதுமக்கள் மற்றும் அரசுப் பணியாளா்கள் பங்கேற்கும் வகையில் முதல்வா் கோப்பைக்கான விளையாட்டுப் போட்டிகள் நடத்தப்படுகின்றன.

அதன் அடிப்படையில், திருவண்ணாமலை மாவட்டத்தில் செவ்வாய்க்கிழமை (ஆக.26) தொடங்கி செப். 6 வரை இந்தப் போட்டிகள் நடைபெற உள்ளது.

போட்டிகளை மாவட்ட ஆட்சியா் க.தா்பகராஜ் தொடங்கிவைத்துப் பேசியதாவது:

தமிழகத்தில் 38 மாவட்டங்களில் முதல்வா் கோப்பைக்கான போட்டி பதிவுகள் நடைபெற்றன. இதில், அதிகமாக பதிவு கொண்ட மாவட்டம் திருவண்ணாமலைதான். ஒரு லட்சத்து 34 ஆயிரம் பதிவுகள். இதில் பள்ளி மாணவா்கள் மட்டும் 84ஆயிரம் போ் பதிவு செய்திருக்கிறாா்கள். இது, மாணவ, மாணவிகள் விளையாட்டில் எவ்வளவு ஆா்வமாக உள்ளனா் என்பதை சுட்டிக்காட்டுகிறது.

விளையாட்டை மாணவ, மாணவிகள் பயன்படுத்திக் கொள்ள வேண்டும். உடல் உறுதி ஆரோக்கியம் மற்றும் வாழ்வியல் கோட்பாடுகளுக்கு விளையாட்டு மிக முக்கியம். ஒரு விளையாட்டு வீரருக்கு உள்ள ஒழுக்கம், சுயக்கட்டுப்பாடு, இந்த சமூகத்தில் எந்தத் துறையிலும் இருக்கின்ற நபா்களுக்கு இருக்காது. விளையாட்டை வாழ்வியல் கோட்பாடாக கொள்ள வேண்டும் என்றாா்.

நிகழ்ச்சியில் மாவட்ட வருவாய் அலுவலா் இரா.இராம்பிரதீபன், மண்டல முதுநிலை மேலாளா் (பொ) நோய்லின் ஜான், மாவட்ட விளையாட்டு மற்றும் இளைஞா் நல அலுவலா் சண்முகப்பிரியா மற்றும் துறை சாா்ந்த அலுவலா்கள் கலந்து கொண்டனா்.