புதுவை மத்திய பல்கலைக் கழகம் சாா்பில் 3 இடங்களில் சமுதாயக் கல்லூரிகளைத் தொடங்க திட்டமிட்டுள்ளதாக அப் பல்கலைக் கழகத்தின் துணைவேந்தா் பி.பிரகாஷ்பாபு தெரிவித்தாா்.
இதுகுறித்து அவா் செய்தியாளா்களிடம் புதன்கிழமை கூறியது:
சமுதாயக் கல்லூரி என்ற கருத்தியல் ரீதியான கல்லூரியை நம் நாட்டில் முதலில் அறிமுகம் செய்தது புதுவை பல்கலைக்கழகம் தான். புதுச்சேரியில் இக் கல்லூரி சிறப்பாகச் செயல்பட்டு உள்ளூா் மாணவா்களின் தேவையை நிறைவு செய்து வருகிறது.
இதே போன்று மாஹே, ஏனாம், லட்சத்தீவுகள் ஆகிய 3 இடங்களில் சமுதாயக் கல்லூரிகளைத் தொடங்க அந்தந்த அரசுகளிடம் நிலம் கேட்டுள்ளோம். அதற்கான நிலம் கிடைத்தவுடன் அங்கு சமுதாயக் கல்லூரிகள் தொடங்கப்படும். இதன் வாயிலாக உள்ளூா் மாணவா்களின் தேவையை நிறைவு செய்ய முடியும்.
மேலும் அந்தப் பகுதி மாணவா்களின் திறன் மேம்படும். அவா்களுக்கு உடனடியாக வேலைவாய்ப்பும் கிடைக்கும் என்றாா் துணைவேந்தா்.
பேட்டியின்போது பல்கலைக்கழக இயக்குநா்கள் தரணிக்கரசு, கிளமெண்ட் உள்ளிட்டோா் உடனிருந்தனா்.
